Қанат Бозымбаев Жаңаөзен қаласының стратегиялық маңызы бар кәсіпорындарының жұмысымен танысты

ҚР Премьер-Министрінің орынбасары Қанат Бозымбаев Президенттің елдің батыс өңірлерін әлеуметтік-экономикалық дамытудың шұғыл шаралар жиынтығын әзірлеу жөніндегі тапсырмаларын орындау мақсатында Маңғыстау облысының Жаңаөзен қаласына келді. 

Вице-премьер халықты ауыз сумен қамтамасыз ететін қалалық “Өзен” су тазарту нысанының жұмысымен танысты. Өндіріс көлемін ұлғайту және қолда бар қажеттілікті жабу үшін 2025 жылы 30 мың текше метр су жинауға арналған резервуар салу туралы шешім қабылданды. 

"Жаз мезгілінде Жаңаөзен қаласының тұрғындары таза ауыз су тапшылығына тап болады. Бұл мәселені шұғыл шешу керек. Әкімдікке келесі жазға дейін резервуарлар салып, оны іске қосуды қаржыландыру үшін қараша айында қажетті жобалау-сметалық құжаттаманы әзірлеуді тапсырамын", - деді Қанат Бозымбаев. 

Сондай-ақ, вице-премьер Жаңаөзен қаласында сумен жабдықтау (21,1 км) және су бұру (21,9) желілерін реконструкциялаумен және кеңейту жұмыстарымен танысты. Биылғы жылы "Шаңырақ"," Шұғыла"," Астана"," Мамыр "және" Теміржол вокзалы" шағын аудандарындағы жұмыстар аяқталады. Ал 2025 жылы қалада кәріз тазарту құрылысын қайта жаңарту ісі басталады. 

Осы жылдың желтоқсан айында қуаттылығы тәулігіне 50 000 м3 су тұшытатын зауыттың құрылысы басталады. Құрылыс кезінде 300 адам жұмыспен қамтылады.

Одан әрі вице-премьер "Қазақ газ өңдеу зауыты" ЖШС-не барды. Онда бүгінде 700-ден астам адам еңбек етеді. Зауыт жылына 1,5 млрд. м3 шикі газды өңдейді. Кәсіпорын аумағында жаңа газ өңдеу зауыты салынуда. Ол 2027 жылы іске қосылып, 700 тұрақты жұмыс орнын құрылады деп жоспарлануда.

Сонымен қатар, Жаңаөзен қаласында сорғы-компрессорлық құбырлар мен сорғы штангаларын шығаратын зауыт құрылысы жүріп жатыр, бұл қосымша 250 тұрақты жұмыс орнын құруға мүмкіндік береді.  

Сондай-ақ, Маңғыстау облысында Qazaq Gaz компаниясы түрік инвесторы Esta Construction-мен бірлесіп, 400 адам тұрақты жұмыс істей алатын карбамид пен аммиак өндіретін зауыт салуды жоспарлап отыр. 

Жұмыс сапары аясында Қанат Бозымбаев "Өзенмұнайгаз"АҚ-ға барды. Компания басшылығына “Өзен” және “Қарамандыбас” кен орындарын оңалту жобасына сәйкес мұнай өндіру көлемін ұлғайту тапсырылды. 

Вице-премьер өңірге келген Ұлттық экономика, Құрылыс және өнеркәсіп, экология және табиғи ресурстар, Энергетика вице-министрлерінің қатысуымен жиын өткізді, Маңғыстау облысының әкімі Нұрдәулет Қилыбай мен Жаңаөзен қаласының әкімі Жансейіт Қайнарбаевтың есептерін тыңдап, еңбек, білім беру және денсаулық сақтау саласы бойынша да  бірқатар нақты тапсырмалар берді.

• 05.08.2024
• 147