Е. Ақкенженов: 2024 жылы Маңғыстау облысындағы газдандыру деңгейі 99,9% құрады

Ақтау қаласында ҚР Энергетика вице-министрі Ерлан Ақкенженов Маңғыстау облысының тұрғындарымен кездесіп, өңірдегі мұнай және энергетика салаларында жасалып жатқан жұмыстарды баяндады.

Бүгінгі таңда Маңғыстау облысы Республиканың екінші мұнай өндіруші өңірі болып табылады, оның үлесіне жалпы мұнай өндірудің 17,9%-ы тиесілі. «Қаламқас теңіз, Хазар, Әуезов» кен орындарындағы мұнай өндірудің тұрақты өсуі арқасында 2023 жылы мұнай өндіру көлемі 21 млн.тоннаны құрады. Бұдан басқа кездесу барысында Ерлан Ақкенженов 2024 жылғы 1 қаңтарға өңірді газбен жабдықтау деңгейі 99,9% немесе шамамен 786,4 мың адам (елді мекенде 61-ден 56) тауарлық газбен қамтылғанын айтты. Бұл жоғары көрсеткіштерге «Бейнеу-Жаңаөзен» магистральдық газ құбырының 2-ші желісін салу, «Жаңаөзен-Ақтау» магистральдық газ құбырының 3-ші желісін және «Бейнеу-Жаңаөзен» магистральдық газ құбырын күрделі жөндеу арқасында қол жеткізіліп отыр. Жоспарда «Жаңаөзен-Ақтау» магистральдық газ құбырының 4-ші желісін салу, Бейнеу ауданы Бейнеу ауылында газбен жабдықтау желілерін салу және Маңғыстау облысы Маңғыстау ауданы Тасмұрын және Тиген тұрғын алаптарының газ тарату жүйелерін салу көзделген. Сондай-ақ, вице-министр Жаңаөзен қаласында жоғары технологиялық газ өңдеу зауытын салу туралы баяндады.

«Жаңа зауыт жылына 900 млн м3 көлемінде шикі газды өңдеу өнімділігімен әлемдік стандарттарға сәйкес болады», - деді Е. Ақкенженов.

Кездесуге келген облыс тұрғындары тауарлық газдың тарифтерін белгілеу, жылумен және электр қуатымен үздіксіз қамтамасыз ету, елді мекендерді газдандыру және т.б сұрақтарына жан-жақты жауаптар алды. Сонымен қатар азаматтардың жеке мәселелері бойынша қабылдау жүргізілді.

• 08.08.2024
• 111