Мемлекеттік сатып алу: рәсімдердің ашықтығы және отандық кәсіпорындарды қолдау

Мемлекеттік ұйымдардағы шығын мәселесі Президентіміз Қасым-Жомарт Кемелұлы Тоқаевтың, Үкіметтің, заң шығарушы органдардың және қоғамның назарында тұрғаны белгілі. Бұл бағыттағы құқықтық реттеудің міндеттері айқын – шығындардың тиімділігін арттырып, кемшіліктердің алдын алу, сондай-ақ тиісті рәсімдердің ашықтығын қамтамасыз етіп, салық төлеушілердің қаражатын дұрыс пайдалануды жолға қою.

Биыл 1 шілдеде Қасым-Жомарт Кемелұлы «Мемлекеттік сатып алу туралы» Заңға қол қойған еді. Аталған реформа сатып алынатын тауарлардың, атқарылатын жұмыстардың, көрсетілетін қызметтердің сапасын жақсартып, сонымен бірге сатып алу тәртібін оңтайландырып, барлық процесті одан әрі автоматтандыруға бағытталған.

Жаңа заңда қоғамдық мониторингті енгізу қарастырылған, сол секілді сатып алу қорытындыларына шағымдану тәртібі өзгертіліп, жеткізушілердің жауапкершілігі күшейтілді. Заңға тәуелді актілердің аясында сатып алу мерзімі мен рәсімдері қысқарды.

Енді сатып алуды жедел жүргізу мен қажетті рәсімдердің ұзаққа созылуын болдырмау үшін шағымдарды сатып алуды ұйымдастырған азаматтың өзі қарайды. Сатып алу қорытындыларына сотқа шағымданған жағдайда сатып алу рәсімдері тоқтатылмайды.

Бұдан бөлек Президенттің тапсырмасы бойынша «кілтпен тапсыру» құрылыс институтын енгізу қолға алынды. Тиісті жобаларды бір мердігер жүзеге асырады. Айталық, ол жобалаудан бастап, нысанды салу мен оны пайдалануға беруге дейін жауапты болады.

Офтейк-келісімшарттарды қолдана отырып, тауарларды кепілмен сатып алу тетігі енгізіліп жатыр. Мұндай тауарлар бір көзден сатып алынады.

Қосалқы мердігерлікке берілетін жұмыс көлемі 50%-дан 30%-ға дейін азайтылды.

Мемлекеттік сатып алудың бас операторы – «Электрондық қаржы орталығы» АҚ базасында қолданыстағы сатып алу алаңдарын интеграциялау арқылы сатып алудың бірыңғай платформасы құрылды.

Аталған платформа мемлекеттік сатып алуларға, ұлттық компаниялардың сатып алуларына және «Самұрық-Қазына» ұлттық әл-ауқат қорының сатып алуларына қатысуға мүмкіндік береді.

Қазақстанның өндірушілерін қолдау мақсатында 2024 жылдың наурыз айында отандық өндірісті ынталандыру мен елішілік құндылықты (қазақстандық үлесті) ұлғайтуға байланысты келесідей шаралар қабылданды.

Отандық өндірушілерге арналған преференциялар (артықшылық):

- 30% авансты міндетті түрде төлеу;

- қамтамасыз етудің барлық түрінен босату;

- шартты міндеттемелерді тиісінше орындамағаны үшін тұрақсыздық айыбын шарт сомасынан 10%-дан 3%-ға дейін төмендету қарастырылған

• 08.08.2024
• 182