ҚДБ және JIBIC: экономиканың тұрақты дамуы үшін әріптестік

«Қазақстанның Даму Банкі» АҚ («Бәйтерек» холдингінің еншілес құрылымы) Japan Bank for International Cooperation (бұдан әрі – JBIC) компаниясымен өзара түсіністік туралы меморандум жасады.

Қол қою Қазақстан-Жапон бизнес форумы аясында өтті. Меморандумға ҚДБ Басқарма төрағасы Марат Елібаев пен JBIC басшысы Хаяси Нобумицу қол қойды.

«Бұл құжатқа қол қою – Қазақстан мен Жапония арасындағы экономикалық байланыстарды нығайту жолындағы маңызды қадам. Бұл ынтымақтастық Қазақстанда еліміздің экономикалық, экологиялық және әлеуметтік тұрақтылығына ықпал ететін жобаларды іске асыру үшін жаңа мүмкіндіктер ашады», - деп атап өтті ҚДБ Басқарма төрағасы Марат Елібаев.

Тараптар баламалы энергетика мен көліктік инфрақұрылымды қоса алғанда, энергетика, инфрақұрылым, машина жасау, тамақ өнеркәсібі және т.б. экономика секторларында инвестициялық жобаларды қаржыландыру аясында ынтымақтастықты жүзеге асыруға ниетті. Сондай-ақ Меморандум Қазақстан Республикасындағы жапондық компаниялардың қатысуымен экологиялық және тұрақты құрамдас бөлігі бар жобаларды қаржыландыру үшін әлеуетті мүмкіндіктер бойынша ақпарат алмасуға ықпал ететін болады.

Қазақстанның Даму Банкі мен Japan Bank for International Cooperation көп жылдық ынтымақтастық тәжірибесіне ие. Мәселен, ҚДБ жапон банкінің жеңілдетілген қарыздары есебінен Қазақстандағы екі ірі инфрақұрылымдық жобаны – Ақтау портын кеңейтуді және Қызылорда облысында газ турбиналы электр станциясын салуды қаржыландырды.

• 12.08.2024
• 136