Ұлттық экономика вице-министрі Түркістан облысына барды

Қазақстан Республикасы Ұлттық экономика вице-министрі Бауыржан Омарбеков жұмыс сапары аясында Түркістан облысындағы құрылыс нысандарын аралап, бірнеше ауданның тұрғындарымен кездесті.

Ұлттық экономика министрлігі жалпы «Ауыл – Ел бесігі» бағдарламасы аясында 2024 жылы Түркістан облысын дамытуға 25,7 млрд теңге бөлуді жоспарлап отыр.

Сауран ауданына қарасты Шорнақ елді мекенінде вице-министр Ұлттық қауіпсіздік комитеті және прокуратура, аудандық полиция бөлімі мен әкімдік ғимараттарын аралады. Кейбір нысандар пайдалануға берілген, ал екі ғимараттың құрылысы ағымдағы жылдың қараша айында аяқталады деп жоспарлануда.

Сондай-ақ, Бауыржан Омарбеков Түркістан қаласындағы автомобиль жолының қайта жаңғырту жұмыстарымен танысты. Теміржол арқылы өтетін көпірдің құрылысы аяқталса, қаладағы қозғалыс айтарлықтай жеңілдейді.

Ордабасы ауданында «Ауыл – Ел бесігі» жобасы аясында 3 спорттық кешен салынуда. Бұған қоса, Қажымұқан Мұңайтпасұлының 150 жылдығына орай ауданда мәдени-спорттық кешеннің құрылысы жүргізілуде.

Кешеннің жобасы үш ғимараттан тұрады. Атап айтқанда мұнда мұражай, кітапхана, көрме залы, жайлы қонақ үй, асхана, конференц-зал, спорт орталығы, спортшыларға арналған киім ауыстыру бөлмелері және басқа да қажетті бөлмелер қарастырылған.

Құрылыс аяқталып, пайдалануға берілгеннен кейін шамамен 150 орындық амфитеатрда облыстық әрі республикалық деңгейдегі кәсіби және олимпиадалық күрес түрлерінен жарыстар өткізу жоспарлануда.

Халықаралық автожол бойында орналасқан заманауи үлгідегі тәулік бойы жұмыс істейтін кешен аймақта туризмнің дамуына ықпал ететін болады. Құрылыстың аяқталу мерзімі 2024 жылдың қараша айы.

Сайрам ауданына жасаған сапары барысында вице-министр Қарасу ауылында «Ауыл – Ел бесігі» бағдарламасы бойынша салынып жатқан спорт кешенінің құрылысымен танысты.

Бауыржан Омарбеков құрылыс сапасын қамтамасыз ету мен маңызды әлеуметтік нысандарды облыс халқына уақытылы тапсыру бойынша тапсырма берді.

Аймақ тұрғындарымен кездесуде тұрғындарды қажетті инфрақұрылыммен, сумен және газбен қамтамасыз ету, сондай-ақ әлеуметтік нысандар санын арттыру мәселелері талқыланды. Бұдан бөлек, вице-министр қазақстандық кәсіпкерлерге арналған мемлекеттік қолдау шаралары туралы да кеңінен айтты.

• 13.08.2024
• 131