Қазақстандағы атом энергетикасы: KazAtomExpo көрмесіндегі жаңа шешімдер мен технологиялар

Астана, 28 тамыз – KazAtomExpo халықаралық ядролық технологиялар көрмесі аясында Қазақстандағы атом саласын дамытудың өзекті мәселелеріне арналған пленарлық отырыс өтті. Іс-шараға саланың жетекші сарапшылары мен «Қазатомөнеркәсіп» ҰАК» АҚ, «Қазақстандық атом электр станциялары» ЖШС және «Қазақстан электр энергетикалық қауымдастығы» ЗТБ сияқты негізгі компаниялардың өкілдері қатысты.

Сессияға қатысушылар Қазақстандағы атом энергетикасының қазіргі жағдайы мен даму перспективаларына байланысты көптеген мәселелерді талқылады. Келесі тақырыптар басты назарда болды:

Атом энергетикасының елдің энергетикалық теңгеріміндегі рөлі: Сарапшылар атом энергетикасының Қазақстанның энергетикалық қауіпсіздігін қамтамасыз етуге қосқан үлесін, оның көміртегі ізін азайту және энергия көздерін әртараптандыру үшін маңыздылығын талқылады.

Технологиялық даму: қатысушылар атом саласына инновациялық технологияларды енгізу тәжірибесімен бөлісті, жаңа реакторлық қондырғыларды дамыту және қауіпсіздік жүйелерін жетілдіру перспективаларын талқылады.

Қазақстанның уран өндіру әлеуеті: атом энергетикасын дамыту үшін маңызды ресурс ретінде уран өндіру саласының ағымдағы жағдайы мен перспективалары қарастырылды.

«Қазақстандық атом электр станциялары» ЖШС Бас директоры Тимур Жантикин қазақстанда атом электр станциясының (АЭС) құрылысы атом индустриясы мен тұтастай ел экономикасы үшін жаңа мүмкіндіктер ашатынын атап өтті.

«АЭС құрылысы елдің ғылыми-техникалық және жоғары білікті кадрлық әлеуетінің өсуіне, құрылыс кезеңінде 8 000-ға дейін жұмыс орнын және пайдалану кезеңінде 2 000-ға дейін сапалы жұмыс орнын құруға алып келеді. Бұл сондай-ақ жергілікті өнеркәсіпті дамытуға, өз отын базасының әлеуетін кешенді пайдалануға және 60 жылдан астам уақыт бойы сенімді энергиямен қамтамасыз етуге ықпал ететін болады. Жалпы, АЭС құрылысы айтарлықтай экономикалық, әлеуметтік, техникалық және экологиялық артықшылықтарға ие», — деп атап өтті Т.Жантикин.

Жыл сайын өсіп келе жатқан энергия тапшылығы мен Қазақстан Үкіметінің көміртексіз энергетикаға көшу бағытын, сондай-ақ елде шикізат және өндірістік базаның болуын ескере отырып, Қазақстанда атом энергетикасын дамыту қисынды және қажетті қадамға айналуда.

«Атом энергетикасы Қазақстанның электр энергетикалық жүйесін дамытуда маңызды рөл атқарады. Біз Үкіметтің атом энергиясын пайдалануды кеңейту жөніндегі күш - жігерін қолдаймыз және осы саладағы ынтымақтастыққа дайынбыз», - деді Қазақстандық электр энергетикасы қауымдастығының төрағасы Талғат Темірханов.

Естеріңізге сала кетейік, 27 тамызда Үкімет Қазақстанда АЭС салу бойынша республикалық референдум өткізу мәселелері бойынша Қаулы қабылдады.

• 28.08.2024
• 53