Маңғыстау облысының әкімі Париж олимпиадасының жүлдегерлері және қатысушыларымен кездесті

24 тамыз күні өңір басшысы Нұрдәулет Қилыбай Париж қаласында өткен Жазғы Олимпиада ойындарына қатысқан Қазақстанның бокс құрама командасымен жүздесті.

Кездесуге келген Ұлттық құрама мүшелерінің қатарында Париж Олимпиадасының күміс жүлдегері Нұрбек Оралбай, 2020 жылғы Олимпиада ойындарының қола жүлдегері Қамшыбек Қоңқабаев, Париж олимпиадасының ширек-финалына дейін өнер көрсеткен Айбек Оралбай, 2020 жылғы Олимпиада ойындарының қола жүлдегері Сәкен Бибосынов, ең жеңіл салмақ дәрежесінде өнер көрсететін Махмуд Сабырхандар бар.

Кездесуде Нұрдәулет Қилыбай Маңғыстаудағы спортты дамыту бағытында атқарылуы тиіс жоспарларымен бөлісіп, спортшылардың алдағы жарыстарына сәттілік тіледі.

-Қай өңірден шықса да қазақтың жеңісі ортақ. Маңғыстау жұрты болып сіздер үшін уайымдадық, сіздер үшін қуандық. Төрткүл дүние көз тіккен Олимпиада ойындарына лицензия алып, рингке шығудың өзі үлкен ерлік. Қаншама еңбек, қаншама тер төгілді. Сондықтан да біз үшін батырсыздар. Сіздермен мақтанамыз,-деді Нұрдәулет Игілікұлы.

Облыс әкімі ұлттық құрама мүшелеріне әлемдік бәсекелерде жеңіс белесін бағындыруына тілектестігін білдіріп, арнайы сый-сияпат жасады.

Кездесу соңында спортшылар ақжолтай тілегін арнаған өңір басшысына алғыс айтып, есімдері жазылған былғары қолғапты арнайы сыйға берді.

Маңғыстау облысы әкімінің баспасөз қызметі

• 02.09.2024
• 46