Маңғыстау облысының әкімі ауылдағы полиция инспекторына қызметтік автокөліктің кілтін табыстады

Өңір басшысы Нұрдәулет Қилыбай сенбі күні Маңғыстау ауданындағы Ұштаған ауылының тыныс-тіршілігімен де танысты. Ұштаған дәрігерлік амбулаториясын аралап, полиция пунктінің ашылу салтанатына қатысты.

Ұштаған ауылдық полиция пункті «жұртқа жақын полиция» қағидаты және полицияның сервистік жұмыс моделі шеңберінде тұрғын үймен біріктіріліп салынған. Полиция бекеті балалар бөлмесімен және бейнебақылау камераларымен жабдықталған.Тәртіп сақшысы отбасымен бірге тұру үшін тұрмысқа қажетті барлық жағдай қарастырылған. Учаскелік полиция инспекторының жұмыста тәулік бойы болуы ең бірінші кезекте ауыл тұрғындары үшін ыңғайлы. Ашылу салтанатында ауыл ақсақалдары баталарын беріп, полиция бекетінің тұсауын кесті. Облыс әкімі Нұрдәулет Қилыбай полиция инспекторына су жаңа қызметтік автокөліктің кілтін табыстады.

Осыдан кейін, аймақ басшысы бес төсектік күндізгі емдеу стационары бар Ұштаған дәрігерлік амбулаториясының жұмысымен танысты. Дәрігерлер амбулатория ғимаратының науқас қабылдауға жарамсыз екенін, күрделі жөндеу жұмыстарын талап ететінін жеткізді. Аймақ басшысы Нұрдәулет Қилыбай бірінші байлық халық денсаулығы екенін айтып, ғимаратқа жөндеу жұмыстарын тездетіп жасауды тапсырды.

Сонымен қатар облыс әкімі бастаған жұмыс тобы Ұштаған ауылының 649 га жеріне қара сексеуіл отырғызылған аумаққа барды. Мұнда жергілікті атқарушы орган жасыл желектерді төрт түліктен қорғау жұмыстарын жүргізуде. Облыс әкімі жасыл оазиске айналған қорғалмалы аумақты қатаң бақылауды тапсырды.

Маңғыстау облысы әкімінің баспасөз қызметі

• 02.09.2024
• 86