Нұрдәулет Қилыбай паралимпиада федерациясының құрметті президенті болып тағайындалды

20 тамызда спорт саласының мамандары қатысқан аппараттық жиында мүмкіндігі шектеулі жандарға арналған федерацияның басшысы Нұралы Құлышев жылдар бойы шешілмей келе жатқан бірқатар мәселелерін көтеріп, облыс әкіміне жан айқайын жеткізді. Мәселенің көптігінен азаматтардың федерация басшысы болудан бас тартатынын айтқан еді.

Ардагер спортшының жан айқайын естіген аймақ басшысы өзін немесе орынбасарларының бірін федерация президенті болуға таңдап алуды ұсынды.

Сол ұсыныс негізінде бүгін, өңірдегі мүмкіндігі шектеулі жандарға арналған федерацияның басшысы Нұралы Құлышев облыс әкімі Нұрдәулет Қилыбайға паралимпиада федерациясының құрметті президенті болуға ұсыныс жасады. Өз кезегінде аймақ басшысы жауапты әрі сауапты істі қолдайтынын айтып, ұсынысты қабылдады.

Жиында Федерация Президиумының шешімімен Нұрдәулет Қилыбай облыстық паралимпиада федерациясының құрметті президенті болып тағайындалды.

- Мүмкіндігі шектеулі жандардың спортпен айналысуына жағдай жасалу қажет. Іргетасы сонау 1992 жылы қаланған федерациядан көптеген спортшыларымыз шықты, жақсы нәтиже көрсетті. Біз паралимпиадалық спорт түрлерін одан әрі дамыту үшін қажетті жағдайды жасауымыз керек. Спорт барлық азаматымыз үшін бірдей қолжетімді болуға тиіс. Мен мұндай жауапты, сауапты істі қолдаймын, - деді облыс әкімі.

Айта кетсек, бүгін Парижде 2024 жылғы жазғы паралимпиада ойындары басталды. Париждегі XVII Жазғы Паралимпиадада волейболды отырып ойнаудан маңғыстаулық Ерболат Алтаев және оның жаттықтырушысы Құралбек Сейдов Қазақстанның Ұлттық құрамасында өнер көрсетеді.

Маңғыстау облысы әкімінің баспасөз қызметі

• 02.09.2024
• 43