Нұрдәулет Қилыбай: Мемлекет басшысының жолдауындағы тапсырмалар ең бірінші кезекте біздің тұрғындар үшін керек

4 қыркүйек күні облыс әкімі Нұрдәулет Қилыбайдың төрағалығымен өткен аппараттық жиында Мемлекет басшысының жолдауын сапалы орындау тетіктері талқыланды.

Маңғыстау облысының экономика және бюджеттік жоспарлау басқармасы басшысының м.а. Лаура Мұхамбетова Мемлекет басшысының Жолдауында айтылған 9 негізгі бағыт бойынша жүзеге асырылуы тиіс жобаларды таныстырды.

- Мемлекет басшысы Қасым-Жомарт Кемелұлы Тоқаев өзінің халыққа Жолдауында «Әр кәсіпкер қолдаудың қандай түрі бар екенін және оған қалай қол жеткізе алатынын еш қиындықсыз біліп отыруы қажет» деп атап өтті. Осы орайда, кәсіпкерлерге және кәсіпкерлік бастамасы бар азаматтарға қолдау көрсету мақсатында Ақтау, Жаңаөзен қалаларында және барлық аудан орталықтарында жергілікті бюджет есебінен қызмет көрсету орталықтары жұмыс жасауда. Сонымен қатар, Жаңаөзенде газ өңдеу кәсіпорындарының құрылысын жеделдету бойынша жұмыстар жүргізілуде, бұл өңірдің өнеркәсіп әлеуетін арттыруға бағытталған, – деді Лаура Мухамбетова.

Өңір басшысы Нұрдәулет Қилыбай Мемлекет басшысының Жолдауын тиімді жүзеге асыру үшін мемлекеттік органдарға нақты ұсыныстар мен шараларды уақыт оздырмай, ұсыну керектігін айтты.

- Мемлекет басшысының жолдауында айтылған тапсырмалар ең бірінші кезекте біздің тұрғындар үшін керек. Сондықтан да уақыт оздырмай, жоғарыдан тапсырманы күтпей, ұсыныс енгізіп, жұмысты бастап кетуіміз қажет, – деді Нұрдәулет Қилыбай.

Маңғыстау облысы әкімінің баспасөз қызметі

• 05.09.2024
• 92