МАҢҒЫСТАУ ОБЛЫСЫ ӘКІМІНІҢ ҚАБЫЛДАУЫНА ЖҮЗГЕ ЖУЫҚ ТҰРҒЫН КЕЛДІ

Бүгін Маңғыстау облысының әкімі С.Трұмов тұрғындарды қабылдады. “Бірыңғай қабылдау күніне” жүзге жуық адам жазылған. Тұрғындарды қабылдау барлық санитарлық-эпидемиологиялық талаптарға сай жүргізілді.
Басым бөлігі баспана мен жұмыс сұрағандар. Жаңаөзеннен келген азамат екі ұлына жұмыс сұрайды. Әкім Ақтауға жұмысқа келуді ұсынды.
Алаяққа алданғандар, дертіне шипа іздегендер, заңсыздыққа тап болғандар да облыс әкіміне мұңдарын шағып, мәселесін жеткізді.
Облыс әкімінің қабылдауында ақтаулық қос егіз жұп та болды. Ақтауда психологиялық-логопедиялық орталық ашып, мектепке дейінгі балаларды оңалтуға атсалысып жүрген егіз жұп енді мектеп ашуды ұйғарыпты.

Аймақ басшысынан осы бастамасына қолдау көрсетуді, тиісті мамандардың кеңесін алуға көмек беруді сұрады. С.Трұмов жастардың игі істеріне сәттілік тілеп, тиісті басқарма басшыларына заң аясында мәселені шешуді тапсырды.

Жеке қабылдаудан бөлек, облыс әкімінің орынбасарлары, қала, аудан әкімдері мен басқарма басшылары да тұрғындарды жеке мәселесімен қабылдады.

Маңғыстау облысы әкімінің баспасөз қызметі

• 12.02.2021
• 301