Ғалым Шойкин ауыл әкімдері, аудан, қала әкімдерінің орынбасарлары, құқық қорғау органдары мен ішкі саясат бөлімдерінің басшылары мен мамандарына арналған «Азаматтық қоғам – тұрақтылық пен бірліктің кепілі» тақырыбында семинарға қатысты

Түркістан облысындағы жұмыс сапары барысында ҚР Мәдениет және ақпарат министрлігі Этносаралық қатынастарды дамыту комитетінің төрағасы Ғалым Шойкин ауыл әкімдері, аудан, қала әкімдерінің орынбасарлары, құқық қорғау органдары мен ішкі саясат бөлімдерінің басшылары мен мамандарына арналған «Азаматтық қоғам – тұрақтылық пен бірліктің кепілі» тақырыбында семинарға қатысты.

Аталған жиында өңірдегі қоғамдық-саяси және этносаралық ахуал бойынша атқарылған жұмыстар сараланып, қоғамдық келісімді нығайту, этномедиацияны дамыту жайы талқыланды.

Алқалы жиында сөз сөйлеген Ғалым Нұрмағамбетұлы этносаралық факторды саясиландыруға және бұл мәселеде арандатушылық сипаттағы талқылауларға мүлде жол бермеу бағытында жұмыстарды күшейтудің маңыздылығына тоқталды. Сондай-ақ спикер әлеуметтік желілердегі жалған ақпараттардың таралуы әртүрлі сипаттағы жанжалдардың туындауына әкелетінін, сондықтан осы бағыттағы профилактикалық жұмысты күшейту қажеттігін атап өтті.

Жиынға қатысушылар және басқа да спикерлер саланы дамыту бағытындағы ұсыныс-пікірлерін ортаға салды.

Іс-шараны қорытындылаған Түркістан облысы әкімінің орынбасары Ертай Кенжебекұлы алда тұрған бірқатар міндеттерді айта келе, өңірдегі этносаралық келісімді сақтау, жас ұрпақты патриотизмге тәрбиелеу ісінде осындай іс-шаралардың пайдасы зор екенін айтты.

• 10.09.2024
• 81