Ғалым Шойкин Түркістан қаласындағы «Ұлы Дала Елі» орталығында өткен «Этносаралық қарым-қатынас мәдениетін қалыптастырудың психологиялық-педагогикалық негіздері» тақырыбындағы семинарға қатысты

Р Мәдениет және ақпарат министрлігі Этносаралық қатынастарды дамыту комитетінің төрағасы Ғалым Шойкин Түркістан қаласындағы «Ұлы Дала Елі» орталығында өткен «Этносаралық қарым-қатынас мәдениетін қалыптастырудың психологиялық-педагогикалық негіздері» тақырыбындағы семинарға қатысты.

Шараға полиэтникалық мектептердің меңгерушілері, мұғалімдері мен психологтары қатысты.

Аталған жиын Түркістан облысындағы түрлі этнос өкілдері тығыз шоғырланған аудандық, қалалық, облыстық білім беру ұйымдарының басшылары мен мамандарына білім алушылар арасында этносаралық қатынастарды нығайтуға бағытталған әдістемелік және практикалық көмек көрсете отырып, нақты ұсынымдар беру мақсатында ұйымдастырылды.

Іс-шара барысында сөз сөйлеген Ғ.Шойкин этносаралық қарым-қатынасты нығайту күн тәртібіндегі басты мәселелердің бірі екенін атап өтіп, бұл жұмысты ұйымдастыруда білім алушыларды патриотизмге, толеранттылыққа, жоғары мәдениет пен өзара сыйластыққа тәрбиелеудің маңыздылығына тоқталды.

Сондай-ақ жиында ҚР Президенті Әкімшілігі ҚХА Хатшылығы меңгерушісінің орынбасары Ғ.Махан, «Парасат» медиация және құқық орталығының конфликтологы С.Жұмағұлов, «Қолданбалы этносаяси зерттеулер институты» ЖШС-нің Қолданбалы зерттеулер орталығының директоры Д.Ғали сөз сөйледі.

Семинарға қатысушылар өзара пікір алысып, өзекті мәселелерді талқылады.

Алдағы күндері делегация құрамы Түркістан облысының Сарыағаш және Келес аудандарындағы ҚХА және этномәдени бірлестіктерінің өкілдері, аудан тұрғындарымен кездесетін болады.

• 10.09.2024
• 49