Жастарды әскерге шақыру мәселелері талқыланды

Маңғыстауда көктемгі әскер қатарын 560 жас толықтырып, жоспар 101,5 пайызға орындалды.Бұл туралы облыс әкімі Нұрдәулет Қилыбайдың төрағалығымен өткен әскерге шақыру кезеңіне арналған жиында айтылды.

Қорғаныс істері жөніндегі департамент бастығы Руслан Балтемировтің мәлімдеуінше, нәтижелерге сәйкес, көктемгі шақыру бойынша Түпқараған ауданы 142,9%, Мұнайлы ауданы 113,3%, Ақтау қаласы 100%, Маңғыстау ауданы 100%, Бейнеу ауданы 90,4%, Жаңаөзен қаласы 90,4% көрсеткішке ие болды.

Сондай-ақ, жиын барысында қорғаныс бөлімшелері мен әскерге шақыру пункттерінің инфрақұрылымын жақсарту мақсатында әкімшілік ғимараттардың құрылысы мен жөндеу жұмыстары, көлікпен жабдықтауға қатысты мәселелер талқыланды.

Өңір басшысы Нұрдәулет Қилыбай аталған ұсыныстарға қатысты тиісті шаралар қабылданатынын атап өтті.

- Біздің міндетіміз – әскерге шақыру жүйесінің тиімділігін арттыру. Қазіргі ата-аналар әскердегі соңғы оқиғаларға байланысты балалардың қауіпсіздігі мен денсаулығына алаңдаушылық білдіруде. Осы себепті жастарымыздың Отан алдындағы борышын абыроймен өтеп, олардың қауіпсіздігін қамтамасыз ету – басты назарымызда болуы тиіс. Сонымен қатар, инфрақұрылымды жақсарту жобаларын жүзеге асыру қажет. Құрылыстың жобалық-сметалық құжаттарында артық шығындардың бар екенін байқадық, бұл мемлекеттік құрылыс жобаларында жиі кездеседі. Аталған мәселеге назар аударып, шешім қабылдауымыз қажет, – деді Нұрдәулет Қилыбай.

Айта кетейік, көктемгі шақыру кезінде мерзімді әскери қызметін өткерген Маңғыстау облысының 4 сарбазы Қазақстанның жоғары оқу орындарында тегін білім алуға грант ұтып алды.

Маңғыстау облысы әкімінің баспасөз қызметі

• 11.09.2024
• 45