Ақтауда «Салауатты сана» кеңесінің отырысы өтті

12 қыркүйекте Маңғыстау облысының әкімі Нұрдәулет Қилыбайдың төрағалығымен 
Қазақстан халқы Ассамблеясы жанындағы Аналар кеңесінің «Мәдениетті ана –мәдениетті ұлт» жобасы аясында әзірленген «Салауатты сана» кеңесінің алғашқы отырысы өтті.
Кеңеске Қазақстан Республикасы Әйелдер істері және отбасы-демографиялық саясат жөніндегі Ұлттық комиссия мүшесі, Қазақстан халқы АссамблеясыАналар кеңесінің төрағасы Нәзипа Шанаи қатысты.

Жиында бүгінгі қоғамның дертіне айналған нашақорлық, лудомания, тұрмыстық зорлық-зомбылық, вандализм және ысырапшылдық тақырыбында баяндамалар оқылып, әлеуметтік кеселдермен күресу жолдары талқыланды.

Облыс әкімі Нұрдәулет Қилыбай Мемлекет басшысы Қасым-Жомарт Тоқаевтың «Бес әлеуметтік кеселге» қатысты айтқан тапсырмаларының маңыздылығына тоқталып, оны қоғам болып жоюға шақырды.

-Мемлекет басшысы Қасым-Жомарт Тоқаев Ұлттық Құрылтайда «Біз бес кеселмен бүкіл ел болып күресіп, біржола тосқауыл қоюымыз керек» деді. Шынында да, нашақорлық, құмар ойындар, тұрмыстық зорлық-зомбылық, вандализм және ысырапшылдық секілді әлеуметтік кеселдер қоғамда белең алып тұр. Мәселен, БҰҰ-ның есірткі туралы бүкіләлемдік баяндамасына сәйкес, өткен жылдары Қазақстан тыйым салынған заттарды тұтыну бойынша әлемнің алғашқы ондығына кірді. Бұл – өте өкінішті жағдай. Бұған қоса, вандализм – қоғамдағы тағы бір күрделі мәселе. Маңғыстау өңіріндегі ескерткіштерді қараңыздаршы. Ең жауһар жерлеріміздің сұлулығы шимайлармен зақымдалуда. Жоғарыда аталған кеселдерден арылу үшін алдымен аға буын өкілдері өзімізден бастауымыз керек. Үлкендер моральдік вандализмді қоймаса, жастар материалдық вандализмді қоймайды. Сондықтан жастарға дұрыс бағыт бағдар беретін біздер, – деді Нұрдәулет Қилыбай.

Кеңес қорытындысы бойынша жергілікті атқарушы органдарға салауатты өмір салтын насихаттау, есірткіге қарсы күрес және жастарды дұрыс тәрбиелеу бағытында шаралар қабылдау тапсырылды.

Маңғыстау облысы әкімінің баспасөз қызметі

• 12.09.2024
• 98