Қостанай облысында Қазақстан халқы Ассамблеясының (ҚХА) Журналистер клубының екінші көшпелі отырысы өтті

2024 жылғы 19-20 қыркүйекте Қостанай облысында Қазақстан халқы Ассамблеясының (ҚХА) Журналистер клубының екінші көшпелі отырысы өтті. Іс-шара Қазақстан Республикасы Мәдениет және ақпарат министрлігінің және Қостанай облысы әкімдігінің қолдауымен БАҚ-тың толеранттылықты нығайтуда, қоғамдық келісім мен жалпыұлттық бірлікті сақтауда күш-жігерін шоғырландыру мақсатында ұйымдастырылды.

Отырыста ҚР Парламенті Сенатының депутаты - ҚХА Журналистер клубының төрағасы А.Сатвалдиев, ҚХА атынан ҚР Парламенті Сенатының депутаты Г. Шиповских, ҚР Мәдениет және ақпарат министрлігінің Этносаралық қатынастарды дамыту комитетінің төрағасы Ғ. Шойкин және медиа-жаттықтырушылар сөз сөйледі. Сондай-ақ, іс-шараларға этномәдени бірлестіктердің өкілдері, журналистер клубының мүшелері, блогерлер мен «Қоғамдық келісім» КММ баспасөз хатшылары қатысты.

Онлайн форматта сөз сөйлеген Ғалым Шойкин этносаралық бірлік пен келісім ел дамуының маңызды құндылықтары болып қала беретінін атап өтті. Сондай-ақ, БАҚ пен азаматтардың этносаралық тақырыптарды жариялау мәселелерінде заңнаманы және моральдық талаптарды сақтаудағы жауапкершілігіне тоқталды. Әлеуметтік желілерде «араздық тілінің» алдын алу мәселелеріне де ерекше назар аударылды.

Отырыс барысында қатысушылар этносаралық салада сапалы және объективті контент құрудың түрлі тәсілдерін талқылады. Әлеуметтанушы және PaperLab зерттеу орталығының директоры Серік Бейсембаев ақпараттық кеңістіктегі қақтығыстардың алдын алу әдістемесін ұсынды, ал Factcheck.kz сайтының бас редакторы Думан Смақов этносаралық қақтығыстар кезінде бейне ақпараттың дұрыстығын тексеру туралы айтты.

• 23.09.2024
• 73