«ҚТЖ-Жүк тасымалы» ЖШС жария талқылауға өз өтінімін ұсынды

Бүгін, 2024 жылғы 26 тамызда ҚР ҰЭМ Табиғи монополияларды реттеу комитеті жария тыңдауларда «ҚТЖ-Жүк тасымалы» ЖШС-ның жүк қозғалысындағы локомотивтік тартқыш қызметіне бағаның алдағы уақытта өсетіні жөніндегі хабарламасын талқылады.

Хабарлама ҚР Ұлттық экономика министрінің 2017 жылғы 1 ақпандағы №36 бұйрығымен бекітілген Қоғамдық маңызы бар нарықтарда баға белгілеу қағидаларына (Баға белгілеу қағидалары) сәйкес ұсынылды.

Баға белгілеу қағидалары талап ететіндей, жария тыңдауларды өткізудің мақсаты жариялылықты, ақпараттандыруды, тұтынушылар мен субъектілер мүдделерінің теңгерімін сақтауды, тауарларға (жұмыстарға, көрсетілетін қызметтерге) бағаларды қалыптастырудың ашықтығын және шынайылықты қамтамасыз ету болып табылады.

Жария тыңдауда Комитет Төрағасының орынбасары - Қосымбаев Тимур Ернатұлы төрағалық етті.

Жүк қозғалысындағы локомотивтік тартқыш қызметіне бағаның жобасы бойынша баяндамамен «ҚТЖ-Жүк тасымалы» ЖШС-ның Экономика және қаржы жөніндегі орындаушы директоры Ақынбеков Илияс Жолдасбекұлы сөз сөйледі.

Жария тыңдауларда мүдделі мемлекеттік органдардың, «Атамекен» ҚР ҰКП-ның, бұқаралық ақпарат құралдарының, қоғамдық маңызы бар нарықтар субъектілерінің, сондай-ақ қауымдастықтар мен басқа да ұйымдардың өкілдері қатысты.

Тыңдаулар барысында «ҚТЖ- Жүк тасымалы» ЖШС-ның жүк қозғалысындағы локомотивтік тартқыш қызметтерінің шекті бағасының жобасына пікірлер мен ұсыныстар айтылып тыңдалды.

Комитет субъект пен қызметтің тұтынушылары арасындағы теңгерімді сақтай отырып, негізделген бағаны бекіту кезінде айтылған барлық ұсыныстарды ескеретін болады.

• 23.09.2024
• 49