Ақтауда қала күніне орай күзгі сенбілік ұйымдастырылды

Ақтауда «Таза Қазақстан» экологиялық акциясы аясында қала күніне орай күзгі сенбілік ұйымдастырылды. Сенбілік аясында 100 тоннаға жуық қоқыс шығарылды, - деп хабарлайды otpannews.kz.

Қала әкімдігінің баспасөз қызметінің хабарлауынша, шараға 1500-ге жуық адам қатысқан. Олардың қатарында облыс және қала әкімдігінің қызметкерлері, ірі мұнай компанияларының, «МАЭК» ЖШС өкілдері мен коммуналдық сала қызметкерлері бар. Экологиялық іс-шараға 20 техника жұмылдырылды.

Тазалық жұмыстары «Жылы жағажай», атап айтқанда «МАЭК» су каналының маңында, 15А ш/а «Самал» теңіз жағалауында(Р-1), 34А ш/а «Ана мен бала» облыстық перинаталдық орталығынан бастап 40 ш/а ҚР Тұңғыш Президент саябағына дейін жүргізілді.

-«Таза Қазақстан» экологиялық акциясы аясында қала бойынша санитарлық тазалық және абаттандыру жұмыстары жалғасуда. Сенбілік аясында 100 тоннаға жуық қоқыс шығарылды. Қала әкімдігі тарапынан сенбілікке қатысушылар тазалық жұмыстарына қажетті заттармен қамтылды. Апта сайын ұйымдастырылатын күзгі сенбілік 15 қазанға дейін жалғасады. Барша тұрғындарды қала күнімен құттықтап, апта сайын ұйымдастырылатын сенбілікке қатысуға шақырамын, - деді Ақтау қалалық тұрғын-үй коммуналдық шаруашылық бөлімінің бас маманы Жантілек Асхатов.

• 23.09.2024
• 45