Мемлекет Басшысының Жолдауын іске асыру үшін қандай шаралар қабылданады

Мемлекет басшысының «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауын іске асыру жөніндегі шаралар Үкімет отырысында қаралды.

Премьер-Министрдің орынбасары – Ұлттық экономика министрі Нұрлан Байбазаров экономикалық блоктың 4 бағыты бойынша жұмыс жалғасатынын баяндады. Бұл бюджет саясатының тиімділігін арттыру, салық заңнамасын жетілдіру, инвестициялық тартымдылықты арттыру және кәсіпкерлікті дамыту.

Н. Байбазаров хабарлағандай, бюджет саясатының тиімділігін арттыру үшін ағымдағы жылдың соңына дейін жаңа Бюджет кодексінің жобасы қабылданады деп күтілуде. Онда қаржы бөлуді шектеу және қатаң бақылау үшін неғұрлым пәрменді шаралар қабылданатын болады. Мемлекет қаржысының теңгерімділігін қамтамасыз ету шаралар кешені арқылы, оның ішінде мемлекеттің міндеттемелерін, активтерін және барлық ақша ағындарын шоғырландыру арқылы жүзеге асырылады.

Салық заңнамасын жетілдіру шеңберінде жоспарлы салықтық тексерулер мен тиімсіз салықтық жеңілдіктердің бір бөлігін алып тастау жоспарлануда. Фискалдық саясат та пысықталатын болады. Жаңа Жаңа Салық кодексін 2026 жылғы 1 қаңтардан бастап қолданысқа енгізе отырып, 2025 жылғы шілдеге дейін қабылдау ұсынылады. Бұл белсенді бұқаралық-түсіндіру жұмыстарын жүргізуге, заңға тәуелді актілерді әзірлеуге және Мемлекеттік кірістер комитетінің ақпараттық жүйелерін дайындауға мүмкіндік береді.

Инвестициялық тартымдылықты күшейту мақсатында «инвестор жолдарын» регламенттеу, сондай-ақ осы процесте барлық мемлекеттік органдардың рөлін айқындау бойынша жұмыстар жүргізілуде. Инвесторлардың проблемалары  «осында және қазір» қағидаты бойынша шешіледі. Бұл тәсіл 2029 жылға дейінгі Инвестициялық саясаттың өзекті тұжырымдамасында көрініс табады.

Кәсіпкерлікті дамытуға келер болсақ, Мемлекет басшысы экономикадағы орта бизнестің үлесін 2029 жылға қарай 15%-ға дейін ұлғайту міндетін қойды. Бүгінгі таңда мемлекеттік ынталандыру шараларын өзгерту арқылы орта бизнесті дамыту үшін жағдай жасау бойынша жұмыстар жүргізілуде. Кәсіпорын неғұрлым бәсекеге қабілетті болса, соғұрлым ол қолдау шараларына ие болады.

«Шаралар ұлттық экономиканың өсуіне ықпал ететін бәсекеге қабілетті шағын әрі күшті орта бизнесті қалыптастыруды қамтамасыз етуге мүмкіндік жасайды», - деп түйіндеді вице-премьер.

• 27.09.2024
• 42