Дүниежүзілік банк тобының басқарушы және қаржы директоры Аншула Кант, сондай-ақ Қазақстандағы ДБ-тің тұрақты өкілі Андрей Михнев пен ДБ-тің аға операциялық директоры Янина Ермаковамен кездесіп, өзара тиімді әріптестікті нығайтудың жолдарын талқыладым.

Дүниежүзілік банк – әлем елдеріне қаржылық және техникалық көмек көрсету мақсатында құрылған халықаралық қаржы ұйымы. Аталған қаржы институтының мүшелігіне 189 мемлекет кіреді. 130-дан астам елде бөлімшелерінің қызметі жолға қойылған. ДБ тобы бірегей жаһандық серіктес болып саналады.

Айталық, Қазақстан-ДБ ынтымақтастығының 30 жылдық кезеңінде 8 млрд доллардан астам сомаға 48 бірлескен жоба табысты іске асырылды. Қазір белсенді портфельде 10 инвестициялық операция қамтылған, оның ішінде сенімгерлік қорынан қаржыландырылатын 3 жоба бар. Жалпы резервтелген қаражаттың таза көлемі 4,081 млрд доллар, оның 3,1 млрд доллары (76%) игерілген.

Осы ретте аталған кездесуде А.Кант Дүниежүзілік банк тобының жаңа инновациялық қаржы тетіктерін таныстырғанын айта кетейін.

Тұтастай алғанда, Дүниежүзілік банктің қызметі тек ұйымға мүше елдерге ғана қаржылық қолдау көрсетумен шектелмейді. Сонымен бірге банк түрлі мемлекеттерге қажетті сараптамалық және консультациялық көмекті көрсететінін атап өткен жөн. Мәселен, біздің ДБ-пен арадағы әріптестік неғұрлым инклюзивті және орнықты өсімге қол жеткізу мақсатында Қазақстанда жүргізіліп жатқан реформаларды қолдауға арналған.

• 01.10.2024
• 89