Осакаров ауданына жұмыс сапарым

Өткен жылы біз аудан орталығы мен жақын ауылдарға көңіл бөлдік. Жұмыспен қамту жол картасы бағдарламасы бойынша Осакаровка кентінің жалпы ұзындығы 27,7 шақырым болатын 54 көшесі жөнделді. Қосымша білім беру орталығы орталық жылытуға қосылды. Уызбай ауылында сумен жабдықтау желілері салынды. Ауылдарға кірме жолдар жөнделді. Молодежный кентіндегі жылу желілері мен № 7 қазандық ағымдағы жөндеуден өткізілді. Тұрғын үйлер, мәдени-демалыс орталығы мен «Айгөлек» балабақшасы орталық жылытуға қосылды.

«Ауыл - Ел бесігі» бағдарламасы бойынша Есіл ауылының сумен жабдықтау желілері қайта жаңартылды. Осакаровка кентіне газ жеткізуді бастау жоспарлануда, жобалық-сметалық құжаттама әзірленді.

Биылғы жылы Молодежный кенті басты назарда болады. «Ауыл - Ел бесігі» бағдарламасы бойынша осы кентті дамыту үшін биыл 6 жобаны іске асыруға 1,3 миллиард теңге бөлінді. Кенттегі Мәдениет үйін, кент ішіндегі жолдарды, екі мектепті және спорт кешенін күрделі жөндеуден өткізу жоспарланып отыр. Іске асыру кезеңінде 64 жұмыс орны құрылады.

Өткен жылы жергілікті дәрігерлерге көмек ретінде аурухана цифрлық рентген аппаратымен, жасанды желдету аппаратымен, биохимиялық анализатормен, оттегі концентраторларымен, рециркуляторлармен, пульсеоксиметралармен және басқа да жабдықтармен жарақталды.

«Нұрлы жер» бағдарламасы аясында халықтың әлеуметтік осал топтарына арналған 60 пәтерлік жалдамалы үй салынатын құрылыс алаңын қарап шықтым. Жалпы, Осакаров ауданы биыл әлеуметтік баспана кезегінде тұрған 120 отбасыға пәтер беруді жоспарлап отыр.

«Осакаровка – Молодежный» және «Нұра – Молодежный» жолдарын жөндеуге қаражат бөлінді.

Сол сияқты «Қаныш Сәтбаев атындағы каналдың» бір бекетінде болдым. Ол – Павлодар, Қарағанды, Ақмола облыстары мен Нұр-Сұлтан қаласының тұтынушыларын сумен қамтамасыз ететін No19 сорғы станциясы.

Жыл сайын шамамен 8 миллион тонна көмір беретін «Kazakhmys Coal» ЖШС ірі өндірістік кәсіпорнының жұмысымен таныстым. Оны ел арасында «Бөрлі» деп атайды.

Трудовое ауылында № 15 мектеп жанындағы кәсіптік оқыту-өндірістік мекемесіне бардым. 2020 жылы оқу-өндірістік комбинаты «Ауыл - Ел бесігі» бағдарламасы бойынша күрделі жөндеуден өтті. Қазір мұнда 135 оқушы оқып жүр.

• 15.02.2021
• 344