Мемлекеттік сәулет-құрылыс бақылау басқармасы басшысының есебін тыңдадым

Біз жүргізіп жатқан жұмыстарға қарамастан, заңға қайшы жағдайлар әлі де орын алуда. Тиісті құжаттарсыз объектілерді салу мәселесі тек тұрғын үйлер мен бизнес нысандарына ғана емес, сонымен қатар шаруа қожалықтарының шаруашылық құрылыстарына да қатысты орын алып отыр. Көбінесе құрылыс нормалары ғана емес, жер заңнамасы да бұзылуда. Біз жер учаскелерін мақсатсыз пайдалану, бөтен аумақтарды басып алу және құрылыс ережелерін бұзу фактілерін көріп отырмыз. Бұл ретте бұзушылықтар анықталған кезде шаруа қожалықтарының басшылары сәулет-құрылыс бақылау басқармасы салатын үлкен айыппұлдарға шағымдана бастайды, оларға бизнесті дамытуға тыйым салынады. Сондай-ақ олар кейіннен бірқатар мәселелерге тап болады. Мұндай нысандарды кепіл ретінде пайдалану, субсидия алу немесе заңды түрде пайдалануға беру мүмкін емес. Нәтижесінде бұл бизнестің дамуын тежейді және үлкен айыппұлдарға алып келуі мүмкін.

Жыл ішінде сәулет-құрылыс бақылау басқармасының әкімшілік айыппұлдар мен техникалық тексерулерінен  кейін   келесі нысандар  пайдалануға берілді: 

Шет, Ақтоғай және Қарқаралы аудандарының ауыл шаруашылығы мақсатында салынған - 4 нысан;

Қарқаралы, Ақтоғай, Қарағанды, Балқаш аудандарындағы - 38 дүкен мен кафе;

Приозерск, Балқаш, Қарағанды және Ақтоғай ауданындағы - 6 демалыс аймағы мен монша.

Кейбір жағдайларда әкімдіктер мүлікті тиісті түрде рәсімдеуге көмектесу үшін кәсіпкерлерді түрлі органдарға өздері ертіп әкелуге мәжбүр болады.

Сонымен қатар мен тұрғындарға жылжымайтын мүлікті сатып алмас бұрын құрылыс салушылардың тиісті құжаттарын мұқият тексеріп алу қажеттігін еске саламын. Сіздердің үй салуға қажетті құжаттарды талап етуге құқықтарыңыз бар. Сондай-ақ, сіздер нысанды сәулет-құрылыс бақылау басқармасының сайты арқылы тексере аласыздар. Мұнда тиісті ақпараттар жаңартылып отырады.  

Осы ретте жаңа құрылыс кодексінің енгізілуімен құрылыстың барлық кезеңдерін мемлекет тарапынан бақылау күшейтілетінін еске салғым келеді. Сондықтан барлық құрылыс салушылардан заңнаманың талаптарын қатаң сақтауды және рұқсат беру құжаттарының толық пакетінсіз құрылысқа кіріспеуді сұраймын.

Сәулет-құрылыс бақылау басқармасы мен әкімдіктердің мақсаты бизнесті жазалау емес, керісінше құқықтық салада оларға көмек көрсету болып табылады. Осы арқылы бизнес өркениетті құрылыс нарығын дамытып, сатып алушылардың сенімін арттыра алады.

• 02.10.2024
• 110