Ұлттық экономика министрлігі астана мен республикалық маңызы бар қалаларды дамыту мәселелері жөніндегі заң жобасын таныстырды

Парламент Мәжілісінде Ұлттық экономика вице-министрі Бауыржан Омарбеков  «ҚР кейбір заңнамалық актілеріне астананы және республикалық маңызы бар қалаларды дамыту мәселелері бойынша өзгерістер мен толықтырулар енгізу туралы» заң жобасын ұсынды.

Вице-министрдің айтуынша, заң жобасы жер қатынастары, сәулет және құрылыс, көші-қон, жарнама, экология және т. б. салалардағы мәселелерді шешуге бағытталған.

Мәселен, қалалардың сыртқы келбеті мәселелерін шешу үшін республикалық маңызы бар қала, астана мәслихатының құзыретін дизайн-кодты бекіту жөніндегі нормамен, ал әкімдіктердің құзыретін стационарлық емес объектілерді орнату мен жұмыс істеуі бойынша қағидаларды бекіту жөніндегі нормамен кеңейту ұсынылады.

Сондай-ақ, елордада бірыңғай дизайн-код енгізіледі, бүкіл республика бойынша аудио жарнаманы ашық кеңістікте таратуға және сыртқы (көрнекі) жарнаманы тротуарларда, веложолдарда, автожолдарда және көшелерде орналастыруға тыйым салынады.

Жер кодексіне сәйкес жер учаскелерінің иелері мен жер пайдаланушылар, оларға тиісілі болмайтын жер учаскесіне құқықтарды қайта ресімдеу міндеттері көзделеді.

«Қазіргі уақытта халық ірі қалаларда өмір сүруге талпынуда, бұл үрдіс пәтерлерде тұрғындардың санын шектеусіз тіркеу проблемасына алып келеді», - деп атап өтті Омарбеков.

Осы мәселені шешу үшін тұрғылықты жері және елорда аумағында уақытша болатын жері бойынша тіркеу нормативін бекіту жөніндегі мәслихаттын құзыретін кеңейту, сондай-ақ  Астана аумағында белгіленген нормативтерден тыс тіркеуге тыйым салу ұсынылады.

Бұдан бөлек, құжат қалада қолжетімді ортаны қамтамасыз етуді, елорданың жасыл желекті жерлерінің қысқаруына немесе бүлінуіне жол бермеуді, бөгет алаңдарының жұмысын реттеу және қалдықтарды көлік құралдарын пайдалану арқылы анықталмаған орындарға тастағаны үшін айыппұлдарды арттыруды көздейді.

• 04.10.2024
• 46