Ақмола облысында мұғалімдер күніне орай үздік педагогтар марапатталды

Көкшетауда білім беру қызметкерлерінің кәсіби мерекесіне арналған салтанатты іс-шара өтті. Айта кетсек, бүгінде Ақмола облысының білім беру жүйесінде мектепке дейінгі, орта, техникалық және кәсіптік білім берудің 22,5 мыңнан астам педагогы жұмыс істейді. Облыс әкімі Марат Ахметжанов Ақмола педагогтарының білім беруді дамытуға қосқан елеулі үлесін атап өтті.

«Мұғалімнің, тәлімгердің қоғам өміріндегі рөлі ерекше. Сіздердің қажырлы еңбектеріңіздің арқасында еліміздің жас ұрпағы табысқа жетіп, нағыз патриоттар болып өсуде. Біз балаларымыздың жетістіктерін мақтан тұтамыз. Олардың жеңістері сіздердің кәсіби шеберліктеріңіздің және оқу-тәрбие процесіне қосқан үлестеріңіздің дәлелі. Мемлекет Басшысы Қасым-Жомарт Тоқаев атап өткендей, біздің қоғамдағы еңбекқорлықтың құндылықтары әрқашан бірінші орында тұруы керек. Өздеріңіздей нағыз мамандардың арқасында ұлтымыздың жаңа сапасы қалыптасуда. Педагог, жоғары кәсібилікке ие өз ісінің шебері білікті кадрларды даярлауда шешуші рөл атқарады», - деп атап өтті М.Ахметжанов.

Педагогикалық мамандықтың үздік өкілдері ҚР Білім Министрлігінің «Еңбек ардагері» медалі, «Қазақстан Республикасының Білім беру ісінің құрметті қызметкері», «Ы.Алтынсарин» төсбелгілері, облыс әкімінің алғыс хаты сынды марапаттарға ие болды.

Айта кетейік, 2020 жылдан бастап Ақмола облысы әкімдігінің қаулысымен адал еңбек етіп, кәсіби міндеттерін үлгілі орындаған ұстаздарға «Педагогтің кәсіпқой рөлі үшін» құрметті атағы және ақшалай сертификаттар, «Педагогтің адал еңбегі үшін» жергілікті ерекшелік белгісі беріледі.

Марапаттау соңы мерекелік концертке ұласты.

• 05.10.2024
• 54