Маңғыстаулық әлем чемпионатының жүлдегерлері марапатталды

Бүгін, 8 қазанда, Маңғыстау облысы әкімінің орынбасары Тілеген Әбішев Венгрияның Будапешт қаласында кикбоксингтен әлем чемпионатында жеңіске жеткен жергілікті спортшыларды марапаттады.

23-31 тамыз аралығында өткен чемпионатта жастар және кадеттер арасында 81 кг салмақтағы Махмут Мади қола жүлдеге ие болса, 54 кг және 57 кг салмақтағы Базар Диас пен Құбаш Сахи әлем чемпионы атанды.

Әлем чемпионатына 50 мемлекеттен 800-ден астам спортшы бақ сынады. Қазақстан құрама командасы жалпы есепте үшінші орынға ие болды. оған Маңғыстау өңірінен 10 спортшы қатысты.

Тілеген Әбішев облыс әкімінің атынан спортшыларды құттықтап, арнайы сыйлықтармен марапаттады.

— Әлем чемпионатында жеңіске жеткен спортшыларымыз — біздің мақтанышымыз. Сіздер бүкіл Маңғыстау облысының абыройын қорғап, еліміздің спортына үлес қосып келесіздер. Спорт — еліміздің рухын көтеретін, бірлік пен ынтымақты нығайтатын сала. Біз алдағы уақытта да спортшыларымызды қолдап, оларды халықаралық аренада жетістікке жетуге ынталандыра береміз. Спортты тастамаңыздар, әрдайым алға ұмтылып, жетістіктеріңізбен бізді қуанта беріңіздер. Алдағы жарыстарда жеңіс тұғырында көрінулеріңізге тілектеспін, — деді Тілеген Әбішев.

Айта кетейік, Құбаш Сахи — Маңғыстау энергетикалық колледжінің студенті, 3,5 жылдан бері кикбоксингпен айналысады. Ал Базар Диас — С.Шапағатов мектеп-гимназиясының 11 сынып оқушысы, кикбоксингпен 7 жылдан бері шұғылдануда.

Аталған спортшылар ҚР Ұлттық құрама командасының мүшелері және ҚР Спорт шеберіне үміткер атағына ие. Олардың бұл жетістікке жетуіне жаттықтырушылар Таңбай Жамбыл Ықыласұлы мен Селиков Төремұрат Кадырұлының жоғары біліктілігі септігін тигізді.

Спортшылар 28-31 қазан аралығында Астанада өтетін Р.Қошқарбаевты еске алуға арналған халықаралық турнирге дайындалу мақсатында Грузияға аттанады.

Маңғыстау облысы әкімінің баспасөз қызметі

• 08.10.2024
• 91