Көптен күткен су Егіндікөл ауылына келді

Егіндікөл ауданында Ақмола облысының 23 ауылдық елді мекенін сумен қамтамасыз етудің негізгі көзі болып табылатын Нұра топтық су құбырын ауқымды реконструкциялау мерзімінен бұрын аяқталды. Ұзындығы 68,7 км магистральдық желілердің тозған учаскелерін ауыстыру жұмыстары тәмамдалды және 1 қазаннан бастап ауылға су келе бастады.

Айта кетейік, ұзындығы 337 шақырым болатын су құбыры Егіндікөл және Қорғалжын аудандарының 14 мыңнан астам тұрғынын сумен қамтамасыз етеді.

«Егіндікөлдіктер үшін сумен жабдықтауды қалпына келтіру мәселесін мемлекет басшысы ерекше бақылауға алды. Реконструкция басталғанға дейін магистральдық су құбырының 90%-дан астамы апатты жағдайда болды. Көптеген апаттар су берудің үзілуіне жиі әкеліп соқтырды, бұл халыққа айтарлықтай қолайсыздықтар туғызды. Мәселені шешу үшін Қазақстан Республикасы Су ресурстары және ирригация министрлігі 2022 жылы Нұра су құбырын реконструкциялау бойынша жобалық-сметалық құжаттаманы әзірлеуді бастады», - деп атап өтті Марат Ахметжанов.

Жұмыстар мамандандырылған мердігерлік ұйымдарды тарта отырып, кезең-кезеңімен жүргізілді. Қорғалжын ауданы Сабынды ауылының бас құрылыстарынан Егіндікөл ауылына дейінгі магистральдық желілердің ең тозығы жеткен бөлігінде жұмыс жүргізген «Bertys Construction» ЖШС қатысуын ерекше атап өткен жөн.

Мердігер 68,7 км су құбыры желісін салып, 78 құдық орнатты. Бүгінгі таңда жаңа желілер Қарғалы, Жантеке, Құмкөл және Тоғанас елді мекендерінің игілігіне жарады. Бүгінде іске қосу-баптау жұмыстары, құбырларды жуу және дезинфекциялау аяқталды.

«Бізге су келгеніне қуаныштымыз. Енді халықтың ауданнан қоныс аударуы тоқтайды және аудан тұрғындары үшін жаңа мүмкіндіктер ашылады деп үміттенеміз», - деп бөлісті Егіндікөл ауылының тұрғыны Бегендік Әбілов.

Биыл Үкімет резервінен Егіндікөл және Қорғалжын аудандарының бас су қабылдағыштарын жаңғырту үшін қосымша қаражат бөлінді. Жаңа су құбыры екі аудан тұрғындарының таза ауыз суға үздіксіз қол жеткізуін қамтамасыз ете отырып, олардың өмір сүру сапасын едәуір арттырады.

• 11.10.2024
• 80