Қазақстан «Бір белдеу, бір жол» бастамасы аясындағы саммитке қатысты

Гонконгта (ҚХР) «Бір белдеу, бір жол» бастамасы аясында 9-шы саммит өтті.

Шарада қазақстандық делегацияны Ұлттық экономика вице-министрі Арман Қасенов басқарды. Делегация құрамында Қазақстанның Даму Банкінің, «Бәйтерек» ҰБХ» АҚ, «Қазақстанның инвестициялық даму қоры»(KIDF) өкілдері болды.

Арман Қасенов «Саяси диалог: өзара байланысты әлем үшін көпжақты ынтымақтастық» панельдік сессиясында сөйлеген сөзінде қазіргі геосаяси және геоэкономикалық сын-қатерлер жағдайында «Ұлы Жібек жолын» жандандыру идеясы тың өзектілікке ие болып отырғанын атап өтті.

«Бір белдеу, бір жол» бастамасы 2013 жылы жарияланды. Қазақстан бұл ауқымды жобаны бірінші болып қолдады әрі оны жүзеге асыруда Қытайдың сенімді серіктесі болып табылады», - деп атап өтті вице-министр.

Оның айтуынша, осы бастама аясында барлық елдер өзара тиімді ынтымақтастықты одан әрі кеңейту үшін үлкен әлеуетке иә. Оның ішінде инновациялар мен жасыл энергетика, көлік, логистика және қаржы саласы да бар.

Сондай-ақ сапар барысында қазақ делегациясы Бейжіңде орналасқан бірқатар қытай қаржы институттарымен кездесулер өткізді. Атап айтқанда, «Silk Road Found», Қытайдың мемлекеттік даму банкі (CDB), Азиялық инфрақұрылымдық инвестициялар банкі (AIIB), Қытай-Еуразиялық қоры мен «SINOSURE» сақтандыру сынды компаниялармен кездесті.

• 11.10.2024
• 109