Атырау облысына іссапар

Бүгін Атырау облысына арнайы барып, облыстың бизнес өкілдерімен болған кездесуде жаңа Салық кодексіндегі нормаларды талқылауға қатыстым.
Облыс орталығында өткен басқосуға халықаралық және отандық мұнай компанияларының өкілдері мен Атырау, Ақтөбе, Маңғыстау, Батыс Қазақстан және Қызылорда облыстарының кәсіпкерлері қатысып, оның барысында мұнай саласына салық салу мәселесі пысықталды.  
Бұл ретте Ұлттық экономика вице-министрі Азамат Әмрин, сондай-ақ Мемлекеттік кірістер комитеті төрағасының орынбасары Жаныбек Нұржановпен бірге қазір Парламент Мәжілісінің қарауында жатқан Салық кодексіндегі жаңашылдықтар туралы айтып бердік. Осы жиынға Атырау облысы әкімінің орынбасары Марат Мурзиев та қатысқанын айта кетейік.
Мұнай саласы бюджет түсімдерінің едәуір үлесін қамтамасыз ете отырған ұлттық экономиканың негізгі драйверлерінің бірі болып саналады және солай болып қала беретіні күмәнсіз. Біздің мақсатымыз – барлық тараптың: мемлекеттің, бизнестің және тұтастай қоғамның мүдделерін ескеретін салық салу жүйесін құру. Алдымызда саланың орнықты дамуына ықпал ететін инвестицияларды ынталандырып, инновациялық технологияларды енгізетін тиімді және әділ салық жүйесін құру бойынша міндеттер тұр.
Жаңа Салық кодексінің жобасында салықтар мен бюджетке төленетін басқа да міндетті төлемдер санын азайту көзделген. Маңызды фискалды қайтарымсыз төлемдерді алып тастау және олардың кейбірін біріктіру жоспарланған. Жүйелік шаралар ретінде салықтық жеңілдіктер ұғымын нақты реттеу ұсынылып отыр.
Мұнай-газ және тау-кен салалары бюджет кірістерінің көп бөлігін қамтамасыз ететінін ескере отырып, жаңа шаралар бюджетке түсетін түсімдерді, сондай-ақ жұмыс орындарын тұрақты ұстауға мүмкіндік береді. Бұл жұмыс істеп тұрған немесе жаңа кен орындарын барлау әлеуеті бар өңірлерді дамыту үшін маңызды екенін атап өту керек.

Мемлекет басшысының Қазақстан халқына Жолдауында салықтық әкімшілендіруді цифрландырудың стратегиялық маңыздылығы туралы айтылғаны белгілі. Сондықтан сыбайлас жемқорлық тәуекелдерін азайтып, ашықтықты қамтамасыз ету үшін Қаржы министрлігі салық саласындағы процестерді электронды форматқа көшіруді жедел түрде іске асырып келетінін айта кеткен орынды

• 11.10.2024
• 30