Ақтауда III Халықаралық «Bolashaq Energy» форумы өтті

Ақтауда III Халықаралық «Bolashaq Energy» форумы табысты өтті. Форум Қазақстанның өңірлік энергетикалық тәуелсіздігі, тұрақты даму және батыс аймаққа арналған инновациялық кластерлерді дамыту мәселелерін бір алаңда талқылауға мүмкіндік берді.

Шараға қатысушы мемлекеттік орган өкілдері, кәсіпкерлер, БҰҰ-ның өкілдері, сарапшылар мен студенттер жасыл энергетика, туризм, экология және логистика салаларындағы жаңа шешімдер мен перспективалар туралы пікір алмасты.

Форумды Маңғыстау облысы әкімдігінің қолдауымен Қазақстан Республикасы Президентінің «Bolashaq» Халықаралық стипендиясы стипендиаттарының Қауымдастығы және Сафи Өтебаев атындағы Атырау мұнай және газ университеті ұйымдастырды.

Форум барысында «Bolashaq» Қауымдастығы Кеңесінің төрағасы Жәнібек Катренов өңірдің қарқынды дамып жатқанын және форумның өңірлік дамуға қосатын үлесін атап өтті. «Маңғыстау өңірі қарқынды дамып келеді. Оның туристік әлеуеті өте жоғары. Сол себепті форумға энергетика, туризм, экология және денсаулық сақтау салалары бойынша жетекші спикерлерді шақырдық. «Bolashaq» қауымдастығы – білікті мамандардың ордасы. Әлемнің алдыңғы қатарлы оқу орындарында білім алған болашақтықтармен бірлесіп өңірлердің дамуына бар күш-жігерімізді салуға дайынбыз», – деді Ж.Катренов. Сонымен қатар, кәсіпкер, «Bolashaq»

Қауымдастығының Маңғыстау облысындағы ресми өкілі Мұрат Ақынов өңірлік экономиканың дамуы мен жас мамандардың рөлі туралы айтты:

«Болашақ бағдарламасының түлегі ретінде біз елімізге не қайтара аламыз? Бізге мемлекет инвестиция салды, шетелде білім алдық. Енді осы энергияны Қазақстанның игілігіне қалай жұмсаймыз? Форумда осы және басқа да маңызды сұрақтар бойынша сарапшылармен, өңірлік басшылықпен және бизнес өкілдерімен пікір алмастық. Біз өңірді дамытудың қай бағыттары маңызды екенін талқыладық», – деді ол.

Форумда мұнай-газ секторындағы өзекті мәселелер де қарастырылд. С. Өтебаев атындағы Атырау мұнай және газ университетінің басқарма төрағасы-ректоры Гүлзада Шакуликова Маңғыстау өңірінің стратегиялық маңыздылығын атап өтті: «Форумда мұнай-газ секторы алдында тұрған су тапшылығы, логистика, Каспий суының проблемасы секілді күрделі мәселелер де талқыланды. Әр өңірден келген Қауымдастық мүшелері Маңғыстау аймағына өз күштерін жұмсауға дайын екендерін жеткізді. Маңғыстау – стратегиялық аймақ, оны туризм кластеріне айналдыру өте маңызды. Маңғыстау өңірін дамытуға барлық болашақтықтар үлес қосады деп сенемін», – деді Г.Шакуликова.

Форум нәтижесінде өңірлік экономиканың алдағы даму бағыттары бойынша нақты ұсыныстар жасалды. Маңғыстау өңірінде инновациялық шешімдерді жүзеге асыруға дайын, инвестиция салуға мүдделі компаниялар мен аймақты дамытуға ниетті тұлғалар шақырылды. Енді қатысушылардың ұсыныстары негізінде тиісті ұсынымдар қабылданатын болады.

• 14.10.2024
• 21