Красный Яр ауылында алғашқы медициналық-санитарлық көмек көрсету орталығының күрделі жөндеуі аяқталды

Республика күні қарсаңында Көкшетау қаласына қарасты Красный Яр ауылында үш қабатты алғашқы медициналық-санитарлық көмек көрсету орталығының күрделі жөндеуі аяқталды. Денсаулық сақтау нысанына шамамен 15 мың адам тіркелген. Ем-дом қызметі тек жергілікті тұрғындарға ғана емес, жақын маңдағы ауылдардың тұрғындарына да көрсетіледі.

Жөндеу барысында шатыр, терезелер және есіктер жаңартылып, жылу және дыбыс оқшаулауы жақсартылды, палаталар, кабинеттер, операциялық залдар жөнделді.

Жабдық қорын жаңартуға ерекше назар аударылды: жаңа медициналық жабдықтар орнатылып, желдету, электрмен қуатымен және сумен қамту жүйелері жаңартылды, бұл медициналық қызметтердің сапасы мен тиімділігін арттыруға мүмкіндік береді.

Ақмола облысының әкімі Марат Ахметжанов жаңартылған Орталықты аралап, жұмыс нәтижелерімен танысты. Ол медициналық нысандарды жаңғырту өңірдің басым міндеті екенін атап өтті.

«Жаңартылған орталық – бұл пациенттер мен медициналық персонал үшін жайлы және қауіпсіз жағдайларды қамтамасыз етуге жасалған қадам. Жаңа жабдықтар мен жақсартылған жұмыс жағдайларының арқасында дәрігерлер сапалы әрі жедел қызмет көрсете алады. Қазақстан Республикасының Президенті медицина саласының дамуына ерекше назар аударып келеді. Оның тапсырмасымен өңірде халықтың өмір сүру сапасын жақсарту үшін медициналық нысандарды жаңғырту жалғасуда», – деп атап өтті М.Ахметжанов.

Красный Яр ауылының тұрғыны Базарбай Әбуов көрсетілген қамқорлық пен халықтың өмір сүру деңгейін арттыруға бағытталған жұмыс үшін алғыс білдірді.

Айта кету керек, бизнестің әлеуметтік жауапкершілігі аясында мердігер ұйым жарықтандыру және жалпы құрылыс жұмыстарын жүргізді.

• 23.10.2024
• 77