Ақмола облысындағы колледждің 85 жылдығы: дәстүрлер, инновациялар және мамандар даярлаудағы көшбасшылық

Жұмыс сапары аясында өңір басшысы Марат Ахметжанов Красный Яр ауылындағы көпсалалы инновациялық колледжге барды. Бұл колледж – өңірдің білім беру жүйесінің дамуына белсене қатысып, заманауи оқыту әдістері мен технологияларын енгізіп жүрген ТжКБ-ның алдыңғы қатарлы оқу орындарының бірі.

Көпсалалы инновациялық колледж өз тарихындағы маңызды кезеңді – 85 жылдық мерейтойын атап өтуде.

Құрылған күнінен бастап колледж ұжымы сұранысқа ие кадрларды сапалы дайындауға ерекше назар аударып келеді. Бүгінде мұнда 500-ге жуық студент 9 білім беру бағдарламасы және 17 біліктілік бойынша білім алуда. Олардың кәсіби дамуына 55 педагог пен өндірістік оқыту шеберлері жауапты.

Сонымен қатар, колледж базасында «Team-Agro» ЖШС-мен бірлесіп элеватор жабдықтарын өндіру бойынша шағын кәсіпорын жұмыс істейді, бұл студенттерге өндірістік процестерге тікелей қатысып, өз дағдыларын арттыруға мүмкіндік береді.

Колледж өз инфрақұрылымымен мақтануда: мұнда оқу және тұрмыстық корпустар, зертханалар, шеберханалар, жатақхана, спортзалдар, стадион және автодром бар. Болашақ механизаторлар үшін 307 гектар аумақта оқу шаруашылығы құрылған, онда студенттер астық дақылдары және картоппен жұмыс істеудің практикалық тәжірибесін алады.

«Колледжді бітірген соң, өз мамандығым бойынша жұмыс істегім келеді, болашақта өзімнің техникалық қызмет орталығымды ашуды жоспарлаудамын. Қазіргі таңда менің мамандығым – ең сұранысқа ие мамандықтардың бірі», – деп бөлісті «Автомобиль көлігін техникалық пайдалану, жөндеу және қызмет көрсету» мамандығының 2-курс студенті Кирилл Ламзин.

Өңір басшысы педагогтармен және студенттермен әңгімелесу барысында Ақмола облысы Қазақстанның астық өндіретін негізгі аймақтарының бірі екенін, ауыл шаруашылығы саласының мамандары аграрлық сектор мен өңір экономикасын одан әрі дамыту үшін аса қажет екенін атап өтті.

«Колледж білікті кадрларды даярлау міндетіне толық сәйкес келеді. Ел Президенті кадрлық әлеуетті кезең-кезеңімен арттырудың маңыздылығын атап өтіп, 2025 жылды Жұмысшы мамандықтар жылы деп жариялады», – деп атап өтті облыс әкімі.

• 23.10.2024
• 35