ҚДБ АҚШ долларындағы және теңгелей еурооблигациялардың екі шығарылымын орналастырды

«Қазақстанның Даму Банкі» АҚ еурооблигациялардың екі шығарылымын орналастырды. Біріншісі – 500 млн АҚШ доллары көлемінде АҚШ долларымен, екіншісі – 65 млрд теңге көлемінде теңгемен деноминалданған.

Еурооблигациялардың жаңа шығарылымдарының параметрлері келесідей:

АҚШ долларында көрсетілген еурооблигацияларды шығару:

Көлемі – 500 млн АҚШ доллары, бағалы қағаздардың айналым мерзімі – 5 жыл, кірістілігі – жылдық пайыздық мөлшерлемесі 5,30%.

Теңгемен номиналданған еурооблигацияларды шығару:

Көлемі – 65 млрд теңге, бағалы қағаздардың айналым мерзімі – 3,5 жыл, кірістілігі – жылдық пайыздық мөлшерлемесі 13,50%.

Еурооблигациялардың екі шығарылымы бойынша есептеулер 2024 жылғы 23 қазанда жүргізілді.

Өтінімдер кітабын қалыптастыру нәтижелері бойынша инвесторлардың еурооблигациялардың долларлық шығарылымы бойынша сұранысы ұсыныс көлемінен бір жарым еседен астам асып түскенін атап өткен жөн. Еурооблигациялар инвесторлар арасында айтарлықтай қызығушылық тудырды, бұл Қазақстанның Даму Банкі, атап айтқанда, тұтастай алғанда Қазақстан бағалы қағаздарының инвестициялық тартымдылығын көрсетеді.

Долларлық және теңгелік еурооблигацияларды орналастыру географиясы АҚШ, Ұлыбритания, Еуропаның басқа елдері, Қазақстан және Таяу Шығыс елдерін қамтиды.

Бағалы қағаздардың екі шығарылымына да жиынтық сұранысты 98 инвестор қалыптастырды.

«Ұсыныстан бір жарым еседен асатын жоғары сұраныс – жергілікті және халықаралық инвесторлардың ҚДБ облигацияларына деген сенімінің бірден-бір көрсеткіші. Тартылған қаражат агроөнеркәсіптік кешенді, өңдеуші өнеркәсіпті және инфрақұрылымды қоса алғанда, экономиканың басым секторларын қаржыландыруға бағытталатын болады. Бағалы қағаздарды шығару Банктің халықаралық капитал нарықтарындағы жоғары позициясын растайды және Қазақстанның тұрақты дамуы үшін стратегиялық маңызды жобаларды іске асыруды қолдайды», – деп атап өтті Банктің Басқарма Төрағасы Марат Елібаев.

Citi, J. P. Morgan, ICBC, Societe Generale және Jusan Invest шығарылымның бірлескен букраннерлері болды. Банктің еурооблигациялары «Қазақстан қор биржасы» АҚ (KASE) листингіне енгізілген және Vienna MTF сауда-саттығына жіберілген.

• 24.10.2024
• 106