Қазақстан волейбол федерациясының (ҚВФ) қорытынды есеп беру конференциясы өткізіліп, онда мені 2024-2028 жылдар аралығында ұйымның жаңа президенті ретінде сайлады.

Бұл орайда Қазақстан Республикасының волейбол федерациясы 1992 жылы құрылғанын айта кеткен орынды. Оның қалыптасу күнінен бастап ұйымды Нұртай Әбіқаев басқарып келді. Осы уақыт ішінде Қазақстанның ерлер мен әйелдер құрамасы Әлем, Азия чемпионаттарына және Олимпиада ойындарына қатысып, Азия кубогын жеңіп алды. Орталық Азия ойындарының чемпиондары атанып, «Гран-при» әлемдік сериясына қатысты.

Волейбол бүкіл әлемде ең танымал командалық спорт түрлерінің бірі болып саналады. Отандық спортшылар мен әуесқой волейболшылар Қазақстанда аталған ойынды балалар мен ересектер арасында танымалдығын арттырып, оның қолжетімді болуына зор күш жұмсады.

Федерацияның жетістіктері айтарлықтай нәтижеге ие. Үш баланы тәрбиелеп отырған әке ретінде бұл спорттың балалардың арасында танымал болуы ерекше қуантады. Тек ресми деректер бойынша 357 мыңдай жас қазақстандық волейболмен кәсіби түрде айналысады екен. Бұл жеке клубтар мен Қазақстан чемпионаттарында өнер көрсететін 59 кәсіби клубты есепке алмағандағы статистика. Мұндай әлеуеттің зор перспективасы бар. Біз бұл бағыттағы жұмысты ширата түсуіміз қажет. Қазақстан волейболының, әсіресе балалар, ерлер мен әйелдер волейболының болашағы, сондай-ақ әлемдік рейтингтерде лайықты орын алуға барлық мүмкіндігі бар деп санаймын.  

Спорт саласы әрқашан мемлекеттің ұдайы назарында. Қасым-Жомарт Кемелұлы XXIII жазғы Олимпия ойындарын қорытындылай келе біздің стратегияда көрініс табуға тиіс бірқатар міндетті алдымызға қойды. Мәселен, қаржыландыру саясатын қайта қарап, мемлекеттік бюджет тәуелділігінен арылып, демеушілердің тізімін белсенді қалыптастыруды бастау қажет. Сонымен бірге еліміздің ең шалғай өңірлерінде бұқаралық спортты дамытуға баса назар аударып, жергілікті спортшылардың дайындығын күшейту арқылы халықаралық жарыстарда жоғары нәтижелерге қол жеткізуге жұмыс істеу керек.

Бұл тиімді амал деп ойлаймын. Бізге бос уәде беруден сақ болып, жыл соңына дейін елдегі жағдайды мұқият зерттеп, әрмен қарай даму стратегиямызды бірлесіп әзірлеуге күш салуымыз қажет деп есептеймін. Мен кез келген ұсыныс пен диалогқа ашықпын және  федерацияның барлық деңгейінде бірлесіп, тиімді жұмыс істеуге дайынмын.

• 28.10.2024
• 21