Францияның Қазақстан Республикасындағы Төтенше және Өкілетті Елшісі Сильван Гиогемен кездесу өтті.

Екіжақты экономикалық қатынастарды дамыту мен елімізде бірлескен жобаларды іске асырудың мәселелерін талқыладық.

Сонымен қатар шетелдік дипломатиялық корпустың өкілі Францияның даму агенттігінің қызметі мен экономиканың түрлі салаларында тиімді жобаларды іске асыру бойынша қаржы тетіктері туралы айтып берді.

Бұл ретте ҚР Қаржы министрлігі өзара тиімді ынтымақтастықты дамытып, стратегиялық әріптестікті нығайту мақсатында тұрақты қарым-қатынас орнатуға дайын екенін атап өткім келеді.

Былтыр екі елдің арасындағы тауар айналымы 4,2 млрд долларға жеткенін еске сала кеткен орынды. Оның ішінде 3 млрд доллар – Қазақстанның экспорты болса, 1,2 млрд доллар көлеміндегі сома француз импортына тиесілі. 2005 жылдан бастап бүгінге дейін француз капиталының ұлттық экономикамызға бағытталған қаражат мөлшері 19,5 млрд долларға жеткенін айта кетейін. Бұл арқылы Франция елімізге инвестиция құйып отырған бес ірі инвестордың қатарына кіріп отыр. Қазір республикамызда франциялық инвесторлардың қатысуымен 200-дей кәсіпорын жұмыс істейді.

Мемлекеттік қаржы мен салық салудың ашық, түсінікті әрі тиімді жүйесі ел экономикасының қалыпты жұмыс істеуінің алғышарты болып саналады. Осы орайда Қаржы министрлігі түрлі халықаралық алаңдарда, сондай-ақ дүниежүзілік ұйымдармен белсенді байланысты күшейту бойынша қарқынды жұмысты жүргізіп, сонымен бірге басқа мемлекеттердің билік өкілдерімен бірнеше бағыт пен өзара тиімді ынтымақтастықты арттырып, халықаралық салық саласындағы өзекті мәселелер бойынша пікір алысып келе жатқанын атап өткен жөн.

Осы арқылы қазіргі сын-қатерлерге уақтылы ден қойып, мемлекеттік қаржы, салық пен кедендік әкімшілендіру саласында озық халықаралық тәжірибені дер кезінде енгізуге жол ашылып отыр.

• 29.10.2024
• 27