Тамара Дүйсенова Маңғыстауда «Ауыл аманаты» бағдарламасының жүзеге асу барысымен танысты.

ҚР Премьер-министрінің орынбасары Тамара Дүйсенова Маңғыстау облысына жасаған жұмыс сапары аясында Бейнеу ауданына барып, «Ауыл аманаты» бағдарламасының жүзеге асу барысымен танысты.

Алдымен ауылдықтардың табысын арттыруға бағытталған жоба аясында аудан орталығында тігін шеберханасының жұмысымен танысудан бастады. Бейнеулік Қозыбек Жалғасбаев 5,9 млн теңгелік несие алып, өз кәсібін ашқан. Қазірде 2 адамды жұмыспен қамтып отыр. Жанар Бекжанова да бағдарлама шеңберінде 8,4 млн теңге алып, наубайхана жұмысын дөңгелетуде.

Ал Бейнеулік Мұратбай Ығылманов «Ауыл аманаты» жобасына қатыса отырып, жеңілдетілген 5 млн теңгелік несиеге қой бордақылауды қолға алған. Ата кәсіп, мал шаруашылығын балаларына үйретуді мақсат еткен.

«Бағдарлдама халық үшін өте тиімді. 2,5 пайыздық несие, өтеу төлемін шегеру мүмкіндігі қарастырылған. Кәсіп ашуға ниеттілерге бұл таптырмас мүмкіндік деп ойлаймын», - дейді Мұратбай Ығылманов.

Сапар аясында вице-премьер ауыл шаруашылығы өнімдерін өндірушілер көрмесімен танысып, тұрғындармен тілдесті.

Осыдан кейін Тамара Дүйсенова мен облыс әкімі Нұрдәулет Қилыбай Ақтау қаласында аймақтағы аудан, ауыл әкімдерінің қатысуымен кеңейтілген кеңес өткізді. Жиын барысында азаматтардың табысын арттыруға бағытталған шаралар талқыланды. «AMANAT» партиясының хатшысы Эльдар Жұмағазиев «Ауыл аманаты» бағадарламасы аясында жұмысты ұтымды жүргізуге қатысты бірқатар ұсыныстарды ортаға салды.

Шаруалар өнімін өткізу жолдарына баса мән берілді. Өңірде мектептердегі асханаларды азықпен қамтуға шамамен 8,2 млрд теңге жұмсалады. Оған қажетті өнімдерді жергілікті өндірушілердің өткізуге қауқары бар екені айтылды.

Жиын барысында азаматтардың табысын арттыруға бағытталған шаралар талқыланды. Сондай-ақ, өзге өңірлерден келген кәсіпкерлер шағын кәсіп жүргізу жөніндегі тәжірибелерімен бөлісіп, баяндама жасады. Мәселен, БҚО әкімінің кеңесшісі Алдияр Халелов аймақ әкімдігі мен«Карачаганак Петролиум Оперейтинг Б.В.»арасында жасалған меморандум туралы айтып өтті. Бүгінде екеуара келісім негізінде шаруалардың өнімін тұрақты түрде мекеме сатып алады.

• 05.11.2024
• 23