Талдықорғанда этносаралық қатынастарды дамыту саласындағы мемлекеттік саясатты іске асыру мәселелері бойынша семинар өтті

2024 жылғы 30 қазанда Талдықорған қаласында этносаралық қатынастарды дамыту саласындағы мемлекеттік саясат мәселелеріне арналған семинар өтті. Іс-шараға құқық қорғау және мемлекеттік органдардың өкілдері, аудан әкімдерінің орынбасарлары, аудандардың ішкі саясат бөлімдерінің басшылары және басқа да лауазымды тұлғалар қатысты.
Талқылаудың негізгі тақырыбы этносаралық саладағы мемлекет саясатының негізгі аспектілері және этносаралық негіздегі оқиғаларға жол бермеу жөніндегі мемлекеттік органдардың жұмыс алгоритмдері болды. Мәдениет және ақпарат министрлігі Этносаралық қатынастарды дамыту комитетінің төрағасы Ғалым Шойкин этносаралық сала мемлекеттің ішкі саясатындағы маңызды басымдық болып қала беретінін атап өтті. Ол этносаралық келісімнің негізі азаматтардың этникалық тегіне қарамастан олардың құқықтарының теңдігін қамтамасыз ету және кемсітушілік пен ксенофобияға жол бермеу болып табылатынына тоқталды.
Ғ.Шойкин семинар қатысушыларына этносаралық негіздегі құқық бұзушылықтардың алдын алу бойынша жұмыс алгоритмдерін түсіндірді. Құқық бұзушылардың әлеуметтік ортасымен жұмыс істеудің маңыздылығына және этносаралық инциденттер мен заңнаманы бұзуға әкеп соғуы мүмкін әлеуметтік желілерде тексерілмеген және арандатушылық ақпараттың таралуын болдырмауға ерекше назар аударылды. Спикер этносаралық сипаттағы, оның ішінде әлеуметтік желілердегі кез келген арандатудың құқықтық салдары болуы тиіс екеніне назар аударды. Талқылау барысында профилактикалық жұмысты күшейтуге және мемлекеттік органдар, құқық қорғау құрылымдары мен азаматтық қоғам арасындағы өзара іс-қимылды нығайтуға бағытталған практикалық ұсынымдар айтылды. Семинар тәжірибе алмасу алаңына ғана емес, сонымен қатар, елдегі бейбітшілік пен келісімді нығайту үшін тиімді шешімдер әзірлеу жолындағы маңызды қадамға айналды. Қатысушылар этносаралық бейбітшілікті қолдауға байланысты өзекті мәселелерді шешуде ашық диалог пен бірлескен күш-жігердің маңыздылығын атап өтті.

• 06.11.2024
• 76