Қазақстанда кемсітушілікке қарсы заңнаманы әзірлеу талқыланды

2024 жылғы 1 қарашада Қазақстан Республикасының Мәдениет және ақпарат вице-министрі Айзада Құрманованың төрағалығымен кемсітушілікке қарсы заңнама мәселелері жөніндегі ведомствоаралық жұмыс тобының кезекті отырысы өтті. Іс-шараға мемлекеттік органдар, азаматтық қоғам және құқық қорғау ұйымдарының өкілдері қатысты. Күн тәртібінің негізгі тақырыбы нәсілдік кемсітушіліктің барлық түрлерін жою туралы халықаралық конвенцияны қоса алғанда, Қазақстан Республикасының халықаралық міндеттемелерін орындау шеңберінде кемсітушілікке қарсы заңнамаларды әзірлеу мәселелері бойынша тұжырымдамалық тәсілдерді талқылау болды.
Вице-министр Айзада Құрманова өз сөзінде тікелей және жанама кемсітушілікті (оның ішінде жынысына, нәсіліне, ұлтына, тіліне, дінге көзқарасына, нанымына, әлеуметтік, лауазымдық және мүліктік жағдайына және т. б. белгілері бойынша) айқындауды қамтитын кешенді кемсітушілікке қарсы заңнаманы қабылдау халықаралық міндеттемелерді орындау шеңберінде БҰҰ-ның Қазақстан алдындағы негізгі талабы болып табылатынын атап өтті.
МАМ Этносаралық қатынастарды дамыту комитетінің төрағасы Ғалым Шойкин өз баяндамасында жұмыс тобына келіп түскен ұсыныстарды айтып, сондай-ақ кемсітушілікке қарсы заңнаманы жетілдірудің бірнеше тәсілдерін талқылады. Жұмыс тобының мүшелері ағымдағы жылғы қорытынды отырысқа одан әрі ұсынымдар беру үшін мемлекеттік органдардың ұстанымдарын білдірді.

• 06.11.2024
• 82