ҚДБ Қазақстан қаржыгерлерінің конгресінде тұрақты даму саласындағы бастамаларын ұсынды

«Қазақстанның Даму Банкі» АҚ Қазақстан қаржыгерлерінің XII конгресіне қатысты. Еліміздің қаржы секторының жетекші мамандары мен өкілдерінің басын қосқан іс-шара «Қаржы секторын ырықтандыру: құқықтар мен міндеттер» тақырыбында болып өтті. Конгресс қаржы секторының тұрақты дамуы және ESG принциптерін енгізу шеңберінде ұйымдастырылды.

«Қаржы секторындағы ESG күн тәртібі: не күтіледі, нәтижелер мен болжамдар» панельдік сессиясы аясында ҚДБ Басқарма төрағасы Марат Елібаев Банктің тұрақты даму саласындағы жетістіктерін атап өтті. Төраға өз сөзінде ҚДБ кредиттік портфельдегі көміртегі ізін азайтуға және экологиялық таза жобаларды қолдауға бағытталған экологиялық маңызы бар жобаларды қаржыландыру арқылы Қазақстанның тұрақты дамуын белсенді қолдайтынын атап өтті.

Айта кетерлігі, Банк «жасыл» облигациялардың 2 шығарылымын және тұрақты облигациялардың дебюттік шығарылымын сәтті жүзеге асырды. Бұл осы бағытты дамытудағы маңызды қадам болды. Тұрақты облигациялар шығару Орталық Азиядан келген эмитент үшін халықаралық капитал нарықтарында бірінші болды.

ҚДБ жел, күн және гидроэнергетиканы, энергияны үнемдейтін жобаларды және азық-түлік қауіпсіздігін қамтамасыз ететін тұрақты ауыл шаруашылығы жобаларын қоса алғанда, жаңартылатын энергетика саласындағы жобаларды белсенді қолдайды.

• 15.11.2024
• 98