Қарақия ауданында әлеуметтік нысандар бой көтеруде

Қарақия ауданына қарасты Жетібай және Мұнайшы ауылдарында ангар типті екі бірдей спорт залдың құрылысы жүргізілуде.

Әр спорт залдың жалпы көлемі 24х62 метрді құрайды. Қазіргі уақытта Жетібай ауылындағы құрылыс 70%, Мұнайшы ауылындағы құрылыс 90% орындалды.
Нысандарды толықтай пайдалануға беру 2025 жылға жоспарланып отыр.

Бұл спорт залдар көпфункционалды, барлық спорт түріне бейімделген. Жоба аясында ұлдар мен қыздарға арналған киім ауыстыратын бөлмелер, спортшыларға арналған жуыну бөлмесі, заманауи жабдықталған үлкен зал және жаттықтырушы бөлмесі қарастырылған. Кешен жыл бойы ауа райына тәуелсіз жұмыс істеуге лайықталып салынуда. Ангар типті дизайн қыста жылуды, ал жазда салқындықты тиімді сақтауға мүмкіндік береді. Залдың тәуліктік сыйымдылығы 80 балаға есептелсе, штаттық құрамда 10 қызметкер жұмыс істейді деп жоспарланып отыр.

Бұдан бөлек, Құрық ауылында «Жастар ресурстық орталығын» күрделі жөндеу жұмыстары басталды. Бұл жоба аясында аудан жастарына заманауи құрал-жабдықтармен қамтамасыз етілген коворкинг алаңы, жастармен жұмыс жөніндегі мамандардың кеңселері, қоғамдық-мәдени іс-шараларға арналған конференция залы, кино залы, жастар кафесі, медиа кеңістік, шығармашылық алаңы, бейресми білім беру аймағы және волонтерлар штабы қарастырылған.

Ғимарат аумағында қосымша жастарға арналған 3x3 форматтағы баскетбол алаңы, воркаут алаңы және балалар ойын алаңшасы қолданысқа беріледі. Қазіргі таңда ішкі жұмыстар 70%-ға, ал сыртқы жұмыстар 60%-ға аяқталған.

• 21.11.2024
• 3