Қарағандыда этносаралық қатынастар мәселелері бойынша оқыту семинары өтті

2024 жылғы 15 қарашада Қарағанды қаласының Достық үйінде этносаралық қатынастар саласындағы мемлекеттік саясатты іске асыру мәселелеріне арналған оқыту семинары ұйымдастырылды. Іс-шараға ҚР Мәдениет және ақпарат министрлігі Этносаралық қатынастарды дамыту комитетінің төрағасы Ғалым Шойкин, Қарағанды облысы әкімінің орынбасары Әлібек Әлденей, сондай-ақ өңір қалалары мен аудандары әкімдерінің орынбасарлары, ішкі саясат бөлімдерінің басшылары қатысты. Семинарда этносаралық қатынастар саласындағы мемлекеттік саясаттың басымдықтары, міндеттері мен негізгі бағыттары талқыланып, осы саладағы мемлекеттік органдардың өзара іс-қимыл алгоритмдері түсіндірілді. Өз сөзінде Ғалым Шойкин Қазақстандағы этносаралық интеграция мен келісімді қамтамасыз етудің негізгі құралы ретінде этносаралық коммуникацияларды дамытудың маңыздылығын атап өтті. Ол этностарды біріктіру және ел бірлігін нығайту, сондай-ақ жастар арасында патриотизм мен жалпыазаматтық құндылықтарды тәрбиелеудің маңыздылығына тоқталды.

Бұдан бөлек, спикер этносаралық оқиғаларды уақытылы алдын алу және этномедиацияны дамыту мәселелеріне тоқталды. Сондай-ақ Ғ.Шойкин тұрақтылықтың негізгі факторы этникалық тегіне қарамастан, азаматтардың құқықтарының теңдігін сақтау, қандай да бір кемсітушілік пен ксенофобияға жол бермеу мәселесіне тоқталды. Сонымен қатар, спикер этносаралық негіздегі кез келген инциденттердің алдын алу бойынша мемлекеттік және құқық қорғау құрылымдарының тиімді жұмысы үшін этносаралық саладағы өзара іс-қимыл алгоритмдерін қатаң сақтау қажеттігін айтып өтті. Қорытындылай келе, Ғ.Шойкин Қазақстанда этносаралық қақтығыстар жоқ екенін, алайда тұрмыстық, тұлғааралық және қылмыстық келіспеушіліктер этносаралық инциденттерге айналу қаупін тудыруы мүмкін екеніне тоқталды. Осыған байланысты, спикер жанжалды жағдайларды шешу және белсенді профилактикалық-түсіндіру жұмыстарын жүргізу үшін құқықтық әдістерді қолданудың маңыздылығын айтып түсіндірді.

• 22.11.2024
• 71