Астанада Қазақстан халқы Ассамблеясының «Мың бала» мәдени-ағартушылық жобасының жеңімпаздарын марапаттау рәсімі өтті

2024 жылғы 22 қарашада Қазақстан Республикасының Қарулы күштерінің Әскери-тарихи мұражайында Қазақстан халқы Ассамблеясының «Мың бала» мәдени-ағартушылық жобасының жеңімпаздарын марапаттау рәсімі өтті. «Мың бала» жобасы мектеп жасына дейінгі балаларды, мектеп оқушылары мен түрлі этнос жастарын мемлекеттік тілді үйренуге тарту, сондай-ақ оларды шығармашылық арқылы қазақ халқының ұлттық және рухани құндылықтарына баулуға, қазақстандық бірегейлікті насихаттауға және халық бірлігін нығайтуға бағытталған. Аталмыш іс-шараға Қазақстан халқы Ассамблеясы Төрағасының орынбасары – ҚР Президентінің Әкімшілігі ҚХА Хатшылығының меңгерушісі Марат Әзілханов, ҚР Мәдениет және ақпарат министрлігінің Этносаралық қатынастарды дамыту комитетінің төрағасы Ғалым Шойкин, Қазақстан халқы Ассамблеясы Төрағасының орынбасары Лугмар Буларов, ҚР Парламентінің депутаттары, этномәдени бірлестіктердің, «Ассамблея жастары» РБҚ өкілдері және т.б. қатысты. Марат Әзілханов алғы сөзінде Ассамблеяның «Мың бала» жобасының өскелең ұрпақ арасында мемлекеттік тілді этносаралық қатынас тілі ретінде оқып-үйренуді кеңінен насихаттау арқылы бірлік пен этносаралық келісімді нығайтудағы маңыздылығын атап өтті. Іс-шара бағдарламасы аясында «Мың бала» республикалық мәдени-ағартушылық жобасының 2015-2024 жж. жеңімпаздары өнер көрсетті. Анықтама үшін: «Мың бала» республикалық мәдени-ағартушылық жобасы ҚХА бастамасымен 2015 жылдан бастап жүзеге асырылуда. 2015-2024 жылдар аралығында жобаны іске асыру аясында барлығы 125 мың іс-шара ұйымдастырылып, оған түрлі этнос жастарының 3 млн. жуық өкілі қатысты. Жоба бағдарламасы халықаралық тәжірибені ескере отырып іске асырылады және қатысушыларға мәдени-тілдік ортаға толықтай дерлік қосылуға мүмкіндік береді.

• 22.11.2024
• 74