48 көкшетаулық жаңа пәтер иегері атанды

Ақмола облысында халықты тұрғын үймен қамтамасыз ету жөніндегі бағдарламаларды іске асыру жалғасуда. Бүгін Көкшетауда Сарыарқа шағын ауданындағы жаңа тұрғын үйде 48 пәтер кілттерін салтанатты түрде тапсыру рәсімі өтті.

Пәтерлерді әлеуметтік осал санаттағы тұрғындар – көпбалалы отбасылар, мүгедек адамдар, жетім балалар және басқалар алды.   Жаңа тұрғын үйдің жанында әлеуметтік нысандар: мектептер, балабақшалар және медициналық мекемелер орналасқан.

Кілттерді Ақмола облысының әкімі Марат Ахметжанов табыстады.

«Мемлекет азаматтарды жайлы баспанамен қамтамасыз ету үшін қолдан келгеннің бәрін жасайды. Бүгінгі шара - қазақстандықтардың өмір сүру сапасын арттыруға бағытталған Мемлекет басшысының саясатын нақты іске асырудың көрінісі. Дайын пәтерлерді сатып алудың жаңа тетігі тұрғын үй жағдайларын жақсарту және кезекте тұрғандар үшін күту уақытын қысқарту мәселелерін жедел шешуге мүмкіндік береді», - деп атап өтті өңір басшысы.

Көптеген отбасылар үшін бұл көптен күткен оқиға болды. Олардың ішінде шамамен 20 жыл кезекте тұрған Махаббат Даргенованың отбасына баспаны болу бақыты бұйырды.

«Біз өте қуаныштымыз. Отбасымыз үшін бұл өмірдегі жаңа, қуанышты кезең. Бізді назардан тыс қалдырмағаны үшін ел Президентіне үлкен алғысымды білдіремін», – деп бөлісті облыс орталығының тұрғыны.

Ақмола облысы ТЖД қызметкерлерінің 5 отбасы да жаңа пәтер иегерлері атанды.

Сондай-ақ, облыс әкімі екі көппәтерлі үйдің құрылыс алаңдарында болды. Өңір басшысы пәтерлерді аралап, жұмыс мерзімі мен сапасын сақтаудың маңыздылығын атап өтті. Жаңа үйлер Болашақ қоныстанушылар үшін сенімді және жайлы тұрғын үйге айналуы керек.

Бұл ақмолалықтардың өмір сүруіне қолайлы жағдай жасауға бағытталған өңірдің әлеуметтік инфрақұрылымын дамытудағы маңызды қадам.

• 28.11.2024
• 65