Жамбыл облысына жұмыс сапарымен бардым. Іссапардың бірінші күні бірнеше ірі жобаны іске асыру барысымен таныстым.

Қайнар ауылында Қордай ауданының 3800 гектар егіс алқабын сумен қамтамасыз ететін сорғы станциясы салынып жатыр. Жұмысты келесі жылы аяқтау жоспарланып отыр. Нысанды алдағы суару кезеңінде пайдалану үшін мерзімінен кешіктірмей қолданысқа беруді тапсырдым.

Одан әрі «Көкқайнар-Ақсу» автомобиль жолындағы көпірді су басуының алдын алу үшін Шу өзені жағалауының 1,8 шақырымын нығайту жоспарымен таныстым. Сондай-ақ, жергілікті атқарушы органдармен елді мекендерді су тасқынынан қорғау іс-шараларын талқыладық.

Тасөткел су қоймасын реконструкциялау нәтижесін көрдім. Бүгінгі таңда жер және бетон жұмыстары, ұңғымаларды тазарту, каналдарды жөндеу, дабыл және бейнебақылау жүйелерін орнату, кірме жолды жөндеу толығымен аяқталды. Тек нысанды сынақтан өткізу жұмыстары ғана қалды.

Соңғы үш жылда Тасөткел су қоймасында үлкен жұмыс атқарылды. Бұл бізге алдағы 2-3 жылда 620 млн текше метр су жинауға мүмкіндік береді. Келесі жылы біз су қоймасына 500 млн текше метр су жинауды жоспарлап отырмыз.

Одан әрі Шу ауданының ирригация және дренаж жүйелерін жетілдіру жобасының барысымен таныстым. Бүгінгі таңда 80% жұмыс орындалды. Жергілікті тұрғындардың жобаға қатысты пікірі мен ұсыныстарын тыңдадым. Мердігер ұйым өкілдеріне барлық кемшіліктерді жоюды және келесі жылы жұмысты аяқтауды тапсырдым. Министрлік өз тарапынан барлық қажетті қолдауды көрсетеді.

• 03.12.2024
• 71