Ақмола облысында 2025-2027 жылдарға арналған бюджет бекітілді

Көкшетауда Ақмола облысының 2025-2027 жылдарға арналған бюджеті бекітілген облыстық мәслихат сессиясы өтті. Облыс әкімі Марат Ахметжанов өңірдің дамуына бағытталған бюджеттің негізгі басымдықтарын таныстырды.

Бюджеттің шамамен 60%-ы әлеуметтік блокқа бағытталған. Қаражаттар медициналық-әлеуметтік мекемелерді ұстауға, жұмыссыздықты азайту шараларына және әлеуметтік төлемдерге жұмсалатын болады. Сонымен қатар, алғаш рет зейнеткерлер үшін санаторий-курорттық емделуге және Көкшетау қаласында қоғамдық көлікте тегін жүруге қаражат бөлінді.

Бюджет есебінен өңірде мектепке дейінгі, орта және кәсіби-техникалық білім беруді сапалы қамтамасыз етуге жағдай жасалуда. 2025 жылы білім беру ұйымдарындағы жөндеу жұмыстарына қосымша акмолалық мектептердегі тамақтану сапасын жақсартуға да қаржы қарастырылған.

Денсаулық сақтау ұйымдарын жөндеуге және материалдық-техникалық базаны жақсартуға шамамен 6 млрд теңге бөлінді. Сондай-ақ, келесі жылдан бастап аса тапшы мамандықтар бойынша медициналық қызметкерлерге 8,5 млн теңге көлемінде көтерме төлемдер беріле бастайды.

Агроөнеркәсіптік секторға ерекше назар аударылған. Тұқым шаруашылығы мен басым дақылдарды дамытуға субсидиялар ретінде 51,5 млрд теңге қарастырылған. Ауыл шаруашылығы техникасын жаңарту жұмыстары жалғасуда. «Кең дала 2» бағдарламасы аясында егіс жұмыстарына дайындық үшін жеңілдетілген несиелерге өтінімдер қабылдануда.

Тұрғын үй-коммуналдық және көлік инфрақұрылымын дамытуға 87 млрд теңгеден астам қаражат бөлінді. Халықтың әлеуметтік осал топтары үшін тұрғын үйді сатып алу бағдарламасы жалғасады. 2024 жылы Көкшетауда тұрғын үй қорын реновациялау бағдарламасы басталды. Облыс орталығында 11 локалды аймақтың тұрғын үйлерін кезең-кезеңімен жаңарту жоспарлануда.

Облыс әкімі жоспарлаудың тиімділік принципін ұстану және ауылдарды тең жағдайлармен қамтамасыз ету қажеттігін ерекше атап өтті.

«Жұмысты тиімді жоспарлауға көшу, бюджетті басқарудан нәтижені басқаруға өту керек. Бұл тек жөндеу жұмыстарына ғана емес, құрылысқа жоба-сметалық құжаттамаларды әзірлеуге де қатысты», – деді Марат Ахметжанов.

Сондай-ақ, әкім жобаларды жүзеге асыруда әкімдер мен басқарма басшылары тарапынан тиісті бақылаудың болмауына назар аударды. Облыс депутаттарына жүгінген Марат Ахметжанов жобаларды іске асыруды бақылауда белсенділік таныту қажеттігін атап өтті.

Сонымен қатар, ашықтықты қамтамасыз ету мақсатында жобаларды цифрландыру процесін бастау тапсырылды. Бұл жүйе деректерді басқарудағы маңызды құралға айналатын Ситуациялық орталықтың негізгі элементтерінің бірі болмақ.

Қорытындылай келе, облыс әкімі жергілікті бюджеттің кірісін арттыру резервтерін пысықтау қажеттігін баса айтты.

«Кәсіпкерлікке, әсіресе шағын және орта бизнеске жағдай жасаңыздар. Салық базасын ұлғайтыңыздар. Бұл түптеп келгенде өңірлерде экономиканы екі еселеуге алып келеді. Сонда өз бюджетіміздің есебінен қаржыландыру мүмкіндігі артады», – деп түйіндеді Марат Ахметжанов.

• 12.12.2024
• 71