С.ТРҰМОВ: «ТЕҢІЗ ПОРТЫНЫҢ ҚУАТТЫЛЫҒЫН АРТТЫРУ ҚАЖЕТ»

 «Ақтау» порты – бұл «Транскаспий халықаралық көлік бағыты» Халықаралық Қауымдастығының» тұрақты мүшесі болып табылатын ірі қазақстандық хаб, сондай-ақ «ТРАСЕКА» және «Солтүстік-Оңтүстік» халықаралық көлік дәліздерінің құрамдас бөлігі болып табылады. Өндірістік қуаты - жылына 17,7 млн.тонна. 
2019 жылдың 16 сәуірінде тарихта алғаш рет Ақтау портынан Баку портына фидерлік кемемен контейнерлерді экспорттық тасымалдау басталды.

Бұл жүктер Қытайдан ЕО және Түркия бағытында Қазақстан (Ақтау порты) арқылы транзитпен жөнелтілген транзиттік жүктер болып табылады. Одан әрі ЕО елдеріне Қытайдан транзиттік жүктер Баку – Тбилиси – Карс темір жолы арқылы  және Поти порты арқылы Қара теңізге жөнелтіледі.
Фидерлік кемелер апта сайын тұрақты түрде қатынайды. Бұл Транскаспий халықаралық көлік бағыты бойынша жүк ағынын ұлғайтуға ықпал етіп отыр. Мәселен, 2019 жылы барлығы – 3 511 мың. тонна, ал 2020 жылы – 3 110 мың. тонна жүк тиеп-түсірілген. Биыл бұл көрсеткіштің көлемін - 3 626 мың. тоннаға жеткізу көзделіп отыр.

Құрық паромдық кешені Қытайдан Қазақстан арқылы Еуропа елдеріне теңіз, темір, автомобиль жолдары арқылы жүктерді ауыстырып тиеуге мүмкіндік береді. Құрық портының акваториясына теміржол және автомобиль магистральдары жүргізілген және Орталық Азия, Қытай, Кавказ, Түркия және Еуропа елдері арасында Халықаралық тасымалдар қамтамасыз етіледі. 
 Порттың ыңғайлы географиялық орналасуы Әзірбайжаннан паромдардың жүру уақытын 4 сағатқа қысқартады. Өндірістік қуаты - жылына 6 млн.тоннаға дейін. 2020 жылы Құрық порты еврофураларды тиеп-түсіру бойынша рекордтық көрсеткішке ие болды. 2020 жылдың 6 айының өзінде 4 791 бірлік еврофура тиеп-түсіріліп, бұл өткен жылдың сәйкес кезеңімен салыстырғанда 51% - ға артып отыр. 
Жоспарға сәйкес 2021 жылы  «Құрық - Түрікменбашы» немесе «Құрық – Махачкала» бағыты бойынша жаңа паромдық қатынасын ашу жоспарланып отыр. Сонымен қатар, тиеп-түсірілетін жүк көлемін – 1 755 мың. тоннаға арттыру көзделген. 
Аймақ басшысы С.Трұмов «Құрық - Түрікменбашы» немесе «Құрық – Махачкала» бағыты бойынша жаңа паромдық қатынасын ашуға болатынын айта келіп, осы саладағы жауапты азаматтарға, порт басшыларына Каспий теңізі арқылы шектесетін өзге елдің порттары арасында жолаушылар тасымалын жандандыруды қарастыруды тапсырды.

• 22.02.2021
• 247