ҚМ-нің сыбайлас жемқорлыққа қарсы іс-қимыл жөніндегі заңнамалық бастамалары

ҚР Қаржы министрлігінде тиімділік пен ашықтықты арттыруға, сондай-ақ сыбайлас жемқорлықтың сын-қатерін азайтуға бағытталған мемлекеттік сатып алу туралы заңнаманы жетілдіру бойынша жұмыс тұрақты негізде жүргізіліп келеді.

Осы орайда Мемлекет басшысы 2024 жылдың 1 шілдесінде жаңа шектеулерді қарастыратын «Мемлекеттік сатып алу туралы» Қазақстан Республикасының Заңына (2025 жылдың 1 қаңтарынан бастап қолданысқа енгізіледі) қол қойғанын естеріңізге сала кетейік. Мысалы, егер де әлеуетті өнім беруші бұрын сыбайлас жемқорлық қылмысын жасаған болса, онда өткізілетін мемлекеттік сатып алуға қатыса алмайды. Сондай-ақ мемлекеттік сатып алуға қатысуды шектейтін тұлғаларға байланысты тізім (құрылтайшы, ірі акционер және олармен үлестес тұлғалар) кеңейтілді. Бұдан басқа заңда қарастырылған шектеулердің бұзылғаны анықталған жағдайда тапсырыс беруші келісімшарттың қолданылу мерзімі аяқталғанға дейін оны біржақты тәртіппен бұзуға құқылы. Сондай-ақ мемлекеттік сатып алулар бойынша қоғамдық мониторинг жұмыс істей бастайтынын айта кеткен орынды.

Мемлекеттің сыбайлас жемқорлыққа қарсы шаралары осы процеске азаматтық қоғам институттары мен әр азамат белсенді тартылған жағдайда ғана табысты бола алатынын атап өту керек. Қоғам мен мемлекеттің бірлескен жұмысы арқылы ғана заңға бағынған орта құрып, тиісті мәдениетті қалыптастыра алатынымызды ұмытпағанымыз абзал.

• 20.12.2024
• 65