Жоспарланған жобалар бойынша ақпарат

«Заңсыз иемденілген активтерді мемлекетке қайтару туралы» ҚР Заңын іске асыру үшін Арнаулы мемлекеттік қор құрылды – Қазақстан Республикасының әлеуметтік, экономикалық жобаларын, сондай-ақ Қазақстан Республикасының заңнамасында айқындалатын тәртіппен активтерді қайтару жөніндегі уәкілетті органның шығыстарын қаржыландыру мақсатында ақшаның түсімдері мен жұмсалуын есепке алу үшін Қазақстан Республикасының Бюджет кодексіне сәйкес бюджетті атқару жөніндегі орталық уәкілетті органда ашылған қолма-қол ақшаны бақылау шоты (бұдан әрі - Қор).

Анықтама: Ақшалай түрдегі активтерді есепке алмағанда, ерікті немесе мәжбүрлі түрде мемлекет меншігіне қайтарылған активтер басқарушы компания мүлкінің құрамына қабылданады. Ақшалай түрде қайтарылған активтер тікелей қорға аударылады. Мемлекеттің мүддесіне кірмейтін активтерді басқарушы компания арнаулы қорды толықтыру мақсатында сатуға құқылы.

Қорда жинақталған қаражат әлеуметтік әрі экономикалық жобаларды қаржыландыруға жұмсалатын болады. Осы ақшаның есебінен қаржыландыру тетігі Әлеуметтік және экономикалық жобаларды іріктеу және өлшемшарттарын айқындау қағидаларында айқындалған (ҚР Ұлттық экономика министрінің 2023 жылдың 20 қыркүйектегі №165 бұйрығымен бекітілген).

Осы қағидаларға сәйкес мемлекеттік органдар әзірлеген жобалар мемлекеттік жоспарлау жөніндегі уәкілетті органның экономикалық сараптамасына жататын болады. Бұдан әрі тиісті жобаларды қор қаражаты есебінен қаржыландыру мәселесін бюджеттік жоспарлау жөніндегі уәкілетті орган Республикалық бюджет комиссиясының қарауына шығаратын болады.

Мәселен, Республикалық бюджет комиссиясының шешімдері бойынша қор қаражаты есебінен қаржыландыруға мынадай нысандар мақұлданды:

- Ақмола облысы Зеренді ауданы Зеренді ауылы Тәуелсіздік көшесі 120 мекенжайы бойынша спорт залы бар спорт кешенін салу.

- Түркістан облысы Ордабасы ауданы Темірлан ауылы аудандық балалар музыка мектебінің құрылысы (сыртқы инженерлік желілермен бірге).

- Абай облысының Семей қаласында 100 орынға шақталған 18 жастан асқан азаматтарға арналған психоневрологиялық медициналық-әлеуметтік нысанды салу.

- Алматы облысы Кеген ауданы Жалаңаш ауылында 50 орынға есептелген спорт кешенін салу.

- Ақтөбе қаласында 300 орынға шақталған ерекше балаларға арналған арнайы балабақша салу.

- Шымкент қаласының Сайрам тұрғын алабында Сайрам көмекші мектеп-интернат колледжі үшін 300 орындық жатақхана салу.

- Петропавл қ. «Жас Өркен» шағын ауданында 280 орындық балабақша салу.

- Ұлытау облысы Жаңаарқа ауданы Ақтүбек ауылдық округі Манадыр стансасында 80 орынға есептелген 2 қабатты мектеп ғимаратының құрылысы.

- Ұлытау облысы Қаражал қаласында (Вокзал шағын ауданы) 80 орынға арналған 2 қабатты мектеп ғимаратының құрылысы

- Жетісу облысы Текелі қаласы Рудничный ауылында 30 орынға шақталған мектепке дейінгі білім беретін шағын орталығы бар 200 орындық мектеп салу.

- Жетісу облысы Кербұлақ ауданы Көксай ауылында 60 орынға есептелген мектептің құрылысы.
 

• 20.12.2024
• 80