2025 жылдан бастап алғаш рет медициналық университетте облыс әкімінің оқу гранттары беріле бастайды

Облыста дәрігер мамандардың жетіспеушілігі мәселесін шешу бойынша жұмысты жалғастырып жатырмыз. Осы арқылы медициналық көмектің сапасы да жақсаратын болады. 

Мәселен, 2025 жылдан бастап алғаш рет медициналық университетте облыс әкімінің оқу гранттары беріле бастайды. Бұл біздің медицинамыздың болашағына және өңір тұрғындарының денсаулықтарын нығайтуға оң ықпал етеді. 

Екі жыл ішінде біз медицина мамандарының тапшылығын 62% - ға төмендете алдық. Кешенді кадрлық стратегияның арқасында 563 жаңа медицина қызметкері жұмысқа тартылып, 203 қызметтік пәтер берілді. Сондай-ақ жас мамандарға 8,5 млн теңгеге дейінгі көтерме ақы беруді қолға алдық.   

Сонымен қатар біз дәрігерлердің өздерінің кәсіби дағдыларын белсенді дамытуларына жағдай жасаудамыз. Биыл Германия мен Финляндияда, Испанияда және басқа да елдерде барлығы 106 дәрігер дайындықтан өтті. Бұл жоғары технологиялық медициналық көмектің жаңа түрлерін енгізуге мүмкіндік берді.

Бүгінде облыста медициналық сыныптар да ашылып, болашақ мамандарды мектеп қабырғасында даярлау қолға алынған. Мұндай сыныптар облыстың 94 оқу орнында жұмыс жасайды. 

Дәрігерлерге арналған тұрғын үй құрылысына да ерекше назар аударылуда. Келесі жылы Нұра ауданында жаңа үйді пайдалануға тапсыруды жоспарлап отырмыз. Ал Қарағандыда «Жаңа қала» шағын ауданында тұрғын үй кешенінің құрылысы басталады.

Қабылданған шаралар облыстың денсаулық сақтау жүйесін нығайтуға және медициналық көмектің сапасын жақсартуға көмектесетініне сенімдімін.

• 24.12.2024
• 39