Маңғыстау жұртшылығы Әзірбайжан халқына көңіл айтты

Бүгін, 26 желтоқсан күні Маңғыстау облысы әкімінің орынбасары Тілеген Әбішев пен Ақтау қаласының әкімі Әбілқайыр Байпақов Әзірбайжан Республикасының Ақтау қаласындағы Бас консулдығына барып, ұшақ апатынан қаза тапқан әзірбайжандықтардың рухына арнап гүл шоқтарын қойды.

Облыс басшылары апатта қаза тапқандардың жақындарын сабырға шақырып, Әзірбайжан жұртына амандық тілей отырып, қайғыларына ортақтасты.

Ақтау қаласының әкімі Әбілқайыр Байпақов көңіл айту кітабына Әзірбайжан халқына арнаған қолдау лебізін білдіріп, жазба қалдырды.

Сондай-ақ, консулдық ғимаратына бауырлас халықтың қайғысын бөлісу үшін Ассамблея мүшелері мен түрлі сала өкілдері, ел ағалары, жастар және Ақтау қаласының тұрғындары ағылып келуде.

Айта кетейік, ел Үкіметі тарапынан зардап шеккен жандар мен қаза тапқан азаматтардың отбасыларына тиісті көмек көрсетілуде.

Маңғыстау облысы әкімінің баспасөз қызметі

• 26.12.2024
• 61