Тұрақты болашаққа қадам: Жетісу облысында екі жаңа су электр станциясы іске қосылды

Жетісу облысы Сарқан ауданы Басқан өзенінде ауқымды инвестициялық жоба – СЭС-2 және СЭС-3 екі шағын су электр станциясы каскадының құрылысы аяқталды. 2024 жылдың қазан айының ортасынан бастап СЭС-2-ден өндірілген электр энергиясы жалпы желіге беріле бастады.

Жобаны 2013 жылдан бері өңірде су электр энергия өндірісін табысты дамытып келе жатқан «Baskan Power» ЖШС (бұдан әрі – Компания) жүзеге асырды. Компанияның алғашқы станциясы – Жоғарғы Басқан СЭС-1 2015 жылы іске қосылып, жыл сайын 20,1 млн кВт/сағ электр энергиясын өндіріп келетінін айта кету керек. Енді өңірде жылына шамамен 76,5 млн кВт/сағ электр энергиясын өндіруге қабілетті тағы екі жаңа станция іске қосылды.

«Қазақстанның Даму Банкімен бірлескен жұмыстың арқасында деривациялық үлгідегі СЭС-ті іске асырудың ерекшелігін, сондай-ақ «Жаңартылатын энергия көздерін қолдау жөніндегі есеп айырысу-қаржы орталығы» ЖШС-мен электр энергиясын сатып алу шартының талаптарын ескере отырып, шағын Басқан СЭС каскадын уақытылы іске асыруға қол жеткіздік. Бұл жоба өңірге инвестиция тартуға, жергілікті тұрғындар үшін жұмыс орындарын құруға және электр энергиясын өндіруді ұлғайтуға мүмкіндік берді. Бұл оңтүстік Қазақстан тұрғындары үшін импортқа тәуелділікті азайтуға және тарифтерді тұрақтандыруға бағытталған маңызды қадам», – деді компанияның бас директоры Сәкен Мұратов.

СЭС құрылысы барысында 200-ге дейін жұмыс орны құрылып, станцияларды іске қосқаннан кейін 30 маман тұрақты жұмыспен қамтылды. Жаңа СЭС-тердің жұмысы толық автоматтандырылған, ал заманауи технологиялар пайдалану шығындарын азайтуға мүмкіндік береді. Нысандар ең жаңа жабдықтармен жабдықталған, бұл олардың ұзақ мерзімді сенімділігін қамтамасыз етеді.

Жобаның жалпы құны – 14,8 млрд теңге, оның 9,5 млрд теңгесі «Қазақстанның Даму Банкі» АҚ (бұдан әрі – Банк, ҚДБ) қолдауымен қаржыландырылды.

Аталған жоба Банктің жасыл энергетиканы дамыту стратегиясына толық сәйкес келеді. Өңірдің табиғи-климаттық жағдайлары мен Басқан өзенінің гидроқоры Жетісу облысында тағы бір СЭС-ті жүзеге асыруға мүмкіндік берді. Бұл өз кезегінде ел ішінде өндірілетін жасыл электр энергиясы есебінен тапшылықты азайтуға көмектеседі.

СЭС-2 және СЭС-3 іске қосылуымен Жетісу облысында жалпы қуаты 287 МВт-тан асатын 17 жаңартылатын энергия көзі нысаны жұмыс істейтін болады.

• 28.01.2025
• 70